Ótken aptada Qurmanǵazy atyndaǵy Qazaq ulttyq konservatorııasynda Qazaqstan men Orta Azııaǵa áıgili, Besqala jyraýlyq dástúriniń kórnekti ókili Naýryzbek Nurjaýbaıulynyń (1931-1994) «Naýryzbek jyraý shyǵarmalary» atty kitabynyń tusaýkeseri ótti.
Kitapty jyrshy, QR Mádenıet salasynyń úzdigi, Qurmanǵazy atyndaǵy Qazaq ulttyq konservatorııasynyń aǵa oqytýshysy Kúnqoja Qaırýlla qurastyryp, alǵysózin jazyp, baspaǵa daıyndaǵan. Kitap «Terme, tolǵaý, óleńder», «Arnaýlar, óleń hattar», «Án mátinderi», «Jyr-dastandar», «Maqalalar», «Estelikter», «Jyraýǵa arnalǵan jyrlar» atty bólimderden turady.
Keshte sóz alǵan jazýshy, dramatýrg, T.Júrgenov atyndaǵy Qazaq ulttyq óner akademııasynyń professory Sultanáli Balǵabaev: «Men búgingideı kezdesýdi kóp kútip edim. Asyǵa kútken sebebim, men Qaraqalpaqstan qazaqtarymen baılanys jasaǵanyma bıyl 35 jyldan asty. Meniń jazǵan pesalarym Nókis qalasyndaǵy teatrlarda kóp koıyldy, sonda Besqala halqynyń ónerge, mádenıetke degen yqylasy men qurmeti erekshe ekenin kórgen edik. 1989 jyly Qaraqalpaqstan qazaqtarynyń ádebıetke, mádenıetke jáne qazaq ónerine sińirgen eńbegi jóninde «Enshimiz bólinbegen el edik» degen maqala jazdym. Ol maqala úlken másele kóterip, Tashkentte, Ózbekstannyń ortalyq partııa komıtetinde talqylandy. Osylaısha, eki eldiń baılanysyn, barys-kelisin nyǵaıtý kerek» degen áńgime sol kezde bastalyp edi. «Naýryzbek jyraý shyǵarmalary» atty kitaptyń jaryq kórýimen quttyqtaımyn. Qaraqalpaqstan qazaqtarynyń aqyn-jyraýlary, olardyń shyǵarmalary ushan-teńiz, nasıhattalmaı jatyr. Bul áli basy ǵana» dedi. Keshti Qazaqstan jazýshylar odaǵynyń múshesi, Tólegen Aıbergenov atyndaǵy syılyqtyń laýreaty, aqyn Ahmet Ómirzaq júrgizip otyrdy.
Tusaýkeser merekesine Sultanáli Balǵabaev, Óserbaı Sársenbaıuly, Adaıbek Beıimbetov, Qutmaǵambet Qonysbaı, Sharafaddın Ámir, Berik Júsipov, Aıgúl Qosanova sııaqty elimizge belgili óner ıeleri men aqyn-qalamgerler jáne Naýryzbek jyraýdyń zaıyby Zıba Ótegenqyzy qatysyp jınaq-kitaptyń qazaqtyń óneri men mádenıeti úshin mańyzy zor eńbek ekenin atap ótti.
Keshte áıgili jyraý Óserbaı Sársenbaıuly jáne Kúnqoja Qaırýlla, Jangar Mámbetnazarov syndy jas jyrshylar Naýryzbek jyraýlyń terme-tolǵaýlaryn oryndady.
Nurbaný KAMAL,
"Adyrna" ulttyq portaly
