«برەند» ۇعىمى تاۋار مەن نارىققا قاتىستى ۇعىم بولعانمەن، دامي كەلە بۇل ۇلتتىق قۇندىلىقتىڭ ايشىعىن بايقاتاتىن رۋحاني-يدەولوگيالىق تاڭبا رەتىندە دە قابىلدانىپ كەتتى. وسى ورايدا ءاربىر ءوڭىر دە ءوز برەندىن قالىپتاستىرۋ ارقىلى جالپىقازاقستاندىق قۇندىلىقتى دامىتادى. سارالاي كەلە برەندتىڭ ەكى ءتۇرلى تۋىنداۋ جانە قالىپتاسۋ جولدارى بار ەكەنىن اڭعارۋ كەرەك. بىرەۋى بۇرىننان جۇرتقا، حالىققا تانىمال دۇنيە كەنەتتەن نارىقتاعى ۇلكەن تۇتىنىسقا، بولماسا يدەولوگيالىق تۇتقاعا اينالادى. ال ەكىنشى جول – جولايى، ارنايى تۇردە دامىتا كەلە برەند رەتىندە ايشىقتاۋ ارقىلى جۇرتتىڭ كوزايىمىنا اينالدىرۋ.
ايتالىق، اقتوبە وبلىسى ءۇشىن برەندكە اينالار تاقىرىپ نەگىزىنەن باتىرلىق تاقىرىبى. ارينە بۇل تاقىرىپ قازاقتىڭ قاي وڭىرىنە دە ءتان. الايدا، اقتوبە اۋماعى كەشەگى اڭىزعا اينالىپ وتكەن ءتوميريستىڭ (شىن ەسىمى – تامار، تامشى سوزىنە قاتىستى) باتىر انامىزدىڭ ات سابىلتقان جەرى. دەگەنمەن، تاريحتاعى قىرىمنىڭ قىرىق باتىرى تۋرالى جىر دا، ولاردىڭ بەيىتى دە وسى وڭىردە. بۇعان قوسا ۇلتتىق قۇندىلىققا اينالعان قوبىلاندى باتىر جىرىنىڭ باس كەيىپكەرى دە, ەردىڭ سوڭى ەسەت تە اقتوبەدە ەمەس پە؟!باتىرلىق ينستيتۋتىنان اجىراتۋعا بولمايتىن جانە نۇرپەيىسپەن بىتەتىن جىراۋلىق پەن جىرشىلىق تا بار. بۇل ءوڭىر ەجەلگى ساق-سارمات ءوڭىرى، وعىزدار سىڭگەن جەر. ماسساعات تايپاسى جايلاعان مەكەن.تامىرىن تەرەڭگە جىبەرگەن وسى ايعاقتاردىڭ بۇگىنگى اتريبۋتى اقتوبەلىك برەند بولۋعا ءتيىس جانە سولاي قالىپتاستۋرى بۇگىنگى ۇرپاقتىڭ تىكەلەي مىندەتى.
ناقتىراق ايتساق، ونەردە – جىرشىلىقتى دارىپتەۋ كەرەك; بۇل- ءبىر برەند; سپورتتا - ات سپورتى، اسىرەسە، كوكپار مەن جامبى اتۋ، ساداق اتۋ سىقىلدى ويىندار وشاعى بولۋعا اقتوبە لايىق مەكەن. توعىزقۇمالاق سپورتى بۇل وڭىردە ەرەكشە دامىپ كەلەدى، ەندەشە بەستەم، توعىزات (توعىزقۇمالاقتىڭ ەجەلگى اتاۋى) زياتكەر سپورت تۇرلەرى ودان ءارى ايرىقشا نازاردا بولۋى قاجەت. مەرەكە سايىن، دەمالىس سايىن بۇل سپورت تۇرلەرى كوپشىلىككە كوزايىم بولۋدان تانباعانى ءجون.
بۇدان باسقا سوۆەت وكىمەتى تۇسىندا «مۇعالجار» اتتى اسىلتۇقىمدى جىلقى ءوسىرىلدى، كازىر دە بار. بۇل اسىل تۇقىمدى جىلقى دا الگى برەندتى تۇتاستىرا تۇسەدى. بايلار بۇل تۇقىمدى جارىسا ساتىپ الۋى قاجەت، بۇل ات بايگەدە، كوكپاردا تۇتىنىسقا كوبىرەك ءتۇسۋى كەرەك. جىلقىنى دارىپتەي تۇسەتىن تاعى تۋىندى - جازۋشى عالىم احمەدوۆتىڭ «جەم بويىندا» رومانىندا «قىمىزمۇرىندىق» مەرەكەسى تۋرالى بەكەر ءبىر تاراۋ بەرىلمەگەن. ءتىپتى، بۇگىندە ورىسشا بۇرمالانىپ كەتكەن «جيليانكا»اتاۋىنىڭ ءاءلىمنىڭ ءبىر بالاسى جولان شالدىڭ وتىرعان قونىسى ەكەنى جانە ونىڭ ادام مەن ايۋانعا ءۇيىرىن بەرمەگەن ايگىلى اردالا ايعىرى تۋرالى اڭىزى دا بەكەر ەمەس. الايدا, بۇل برەندتەرگە قاتىستى ءوندىرىس وشاقتارى مەن ونەركاسىپتەر پايدا بولسا ابدەن دۇرىس بولادى. برەند قۇرعاق ناسيحاتپەن ورنىقپايدى: ماتەريالدىق جانە رۋحاني ماپەنىڭ ناتيجەسىندە قالىپتاسادى.
سەرىك ەرعالي،
ەرقوساي ءابىلوۆ
