«سامىرۇق قازىنا» كومپانياسىنىڭ ەكس-ديرەكتورى، شىمكەنتتىڭ اكىمىنىڭ اعاسىنىڭ ايەلى دانا اتەشوۆا بۇرىنعى كۇيەۋى مارات ايتەنوۆتىڭ ءوزىن 9 جىل بويى ۇرىپ-سوعىپ، كەيىن ايەلدى ءۇش بالاسىمەن قالدىرىپ، مۇلكىنەن دە ايىرعانىن ايتىپ بەردى. ول Instagram پاراقشاسىندا شىمكەنت قالاسىنىڭ اكىمىنەن اعاسىنا ىقپال ەتۋدى سۇرايدى، دەپ حابارلايدى “ادىرنا” ۇلتتىق پورتالى.
ول بۇرىنعى كۇيەۋىنىڭ ءوزىن توعىز جىل بويى ۇرىپ-سوعىپ، اجىراسقاننان كەيىن بار مۇلكىن تارتىپ الىپ، ءۇش بالاسىمەن دالادا قالدىرعانىن ايتادى.
“توعىز جىل بويى اياۋسىز تاياقتىڭ استىنا العاندا بىردە-ءبىر مارتە بەتىنە قارسى كەلگەن ەمەسپىن. كوگەرگەن جەرلەرىمدى ەشكىمگە كورسەتپەدىم. ەشقايدا ارىزدانبادىم. وتباسىم ءۇشىن بارىنە كوندىم”، — دەيدى اتەشوۆا.
ايەلدىڭ بارلىعىن اشىق ايتۋعا بەل بايلاۋىنا كۇيەۋىنىڭ ءۇن-ءتۇنسىز اجىراسىپ كەتكەنى سەبەپ بولىپتى. جۇبايىنىڭ بار ماسەلەنى ىڭ-شىڭسىز شەشۋىنە ونىڭ زاڭگەرلىك ءبىلىمى مەن تامىر-تانىستارى سەپتىگىن تيگىزگەنگە ۇقسايدى.
"بۇرىنعى كۇيەۋىم ارامىزعا بالالارىمدى سالىپ، ماعان قىسىم كورسەتە باستادى. ولاردى الىپ كەتىپ، بەلگىلەنگەن مەرزىمدە قايتارمايتىندى شىعاردى. سودان كەيىن ەل اراسىندا بالالارىمنىڭ مەنىمەن ءبىر ۇيدە تۇرعىسى كەلمەيتىنى جايلى وسەك تاراتا باستادى. ەندى كورشىلەرگە بارىپ ەكەۋمىزدىڭ ۇرسىسىپ جاتقانىمىز تۇسىرىلگەن بەينەجازبانى كورسەتۋدى باستاپتى. ول ماعان قول كوتەرىپ، سونى تەلەفونعا ءتۇسىرىپ العان. سول ارەكەتىنەن ءبىر اي بۇرىن مەنى بيىكتىگى ءۇش مەتر ساتىدان يتەرىپ جىبەرىپ، ارتىنشا يتشە تەپكىلەگەنى جانە بار. سودان مەن ءبىر اي بويى جۇرە الماي قالدىم", — دەلىنگەن ايەلدىڭ جازباسىندا.
اتەشوۆا سودان كەيىن ماراتتىڭ ءوزىن بالالارىمەن تۇركياعا دەمالىسقا جىبەرگەنىن ايتادى. ءوزى ەلدە قالعان ايتەنوۆ، بۇرىنعى جۇبايىنىڭ سوزىنە قاراعاندا، بوستاندىقتى ءۇشىنشى رەت ۇيلەنۋ ءۇشىن پايدالانعانعا ۇقسايدى.
“ول بىزدەن جاسىرىنىپ ءۇشىنشى رەت ۇيلەنگەننەن كەيىن ەسىكتىڭ كىلتىن اۋىستىرىپ، بالالارىمدى دالادا قالدىرىپ، ءوزى بال ايىن وتكىزۋ ءۇشىن شەتەلگە ۇشىپ كەتتى”، — دەيدى دانا اتەشوۆا.
سودان كەيىن كەلىنشەك بۇرىنعى كۇيەۋىنىڭ مال-مۇلكىن ساناپ شىعىپ، سونشاما بايلىققا يە ادامنىڭ تۋعان بالالارىنا كومەكتەسكىسى كەلمەيتىنىن ايتتى. سولاي بولا تۇرا، ءۇش بالاسى ءۇشىن 120 مىڭ تەڭگە اليمەنت الاتىنىن اتاپ وتكەن اتەشوۆا بۇل سومانىڭ از ەكەنىن العا تارتتى.
“ادىرنا” ۇلتتىق پورتالى
