ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدىمەن بايلانىستى ءۇش كومپانيا «سامۇرىق-قازىنا» قورىنىڭ مەنشىگىنە ءوتتى. بۇل تۋرالى قازاقستان قور بيرجاسى (KASE) جاريالادى، دەپ حابارلايدى “ادىرنا” ۇلتتىق پورتالى.
«2025 جىلدىڭ 14 اقپانىنان باستاپ «سامۇرىق-قازىنا» ۇلتتىق ءال-اۋقات قورى» اق «اقموليت» جشس، «مارحيت» جشس جانە «توپاز-نس» جشس-ءنىڭ 100% قاتىسۋ ۇلەسىنە يەلىك ەتە باستادى»، - دەپ حابارلايدى قازاقستان قور بيرجاسى (KASE).
وسىلايشا، حيميا ونەركاسىبى ءۇشىن مينەرالدى شيكىزاتتى وندىرەتىن «اقموليت»، اسىل جانە سيرەك مەتالداردى وندىرۋگە ماماندانعان «مارحيت» جانە ينۆەستيتسيالىق جانە ساۋدا دەلدالدىق قىزمەتىمەن اينالىساتىن «توپاز-نس» كومپانيالارى «سامۇرىق-قازىنا» قورىنىڭ ەنشىلەس ۇيىمى – «تاۋ-كەن سامۇرىق» ۇمك» اق مەنشىگىنەن باس كومپانيانىڭ مەنشىگىنە ءوتتى.
بۇل ءۇش كومپانيا، سونداي-اق 2022 جىلى مەملەكەتتىك مەنشىككە وتكەن باسقا دا كومپانيالار ساتىبالدىمەن بايلانىستىرىلادى.
ايتا كەتەيىك، سىيعا تارتۋ كەلىسىمدەرىنىڭ ءبىر كەمشىلىگى بار – ول بۇرىنعى مەنشىك يەلەرىنىڭ اكتيۆتەردى سوت ارقىلى قايتارۋ مۇمكىندىگى، سىيعا تارتۋ كەزىندە بۇرىنعى بەنەفيتسيارلاردىڭ مونوپوليالىق قىزمەتتەن تاپقان كىرىستەرى، جالاقىلارى مەن ديۆيدەندتەرى ەسكەرىلمەيدى.
2023 جىلدىڭ باسىنان باستاپ مۇحاممەدالى ءابدساتتارۇلى دەربىساليەۆ ۇشەۋىنىڭ ىشىندەگى ەڭ ءىرىسى «اقموليت» جشس ديرەكتورىنىڭ مىندەتىن اتقارۋشى بولىپ تاعايىندالدى.
