«Samyruq Qazyna» kompanııasynyń eks-dırektory, Shymkenttiń ákiminiń aǵasynyń áıeli Dana Áteshova burynǵy kúıeýi Marat Áıtenovtiń ózin 9 jyl boıy uryp-soǵyp, keıin áıeldi úsh balasymen qaldyryp, múlkinen de aıyrǵanyn aıtyp berdi. Ol Instagram paraqshasynda Shymkent qalasynyń ákiminen aǵasyna yqpal etýdi suraıdy, dep habarlaıdy “Adyrna” ulttyq portaly.
Ol burynǵy kúıeýiniń ózin toǵyz jyl boıy uryp-soǵyp, ajyrasqannan keıin bar múlkin tartyp alyp, úsh balasymen dalada qaldyrǵanyn aıtady.
“Toǵyz jyl boıy aıaýsyz taıaqtyń astyna alǵanda birde-bir márte betine qarsy kelgen emespin. Kógergen jerlerimdi eshkimge kórsetpedim. Eshqaıda aryzdanbadym. Otbasym úshin bárine kóndim”, — deıdi Áteshova.
Áıeldiń barlyǵyn ashyq aıtýǵa bel baılaýyna kúıeýiniń ún-túnsiz ajyrasyp ketkeni sebep bolypty. Jubaıynyń bar máseleni yń-shyńsyz sheshýine onyń zańgerlik bilimi men tamyr-tanystary septigin tıgizgenge uqsaıdy.
"Burynǵy kúıeýim aramyzǵa balalarymdy salyp, maǵan qysym kórsete bastady. Olardy alyp ketip, belgilengen merzimde qaıtarmaıtyndy shyǵardy. Sodan keıin el arasynda balalarymnyń menimen bir úıde turǵysy kelmeıtini jaıly ósek tarata bastady. Endi kórshilerge baryp ekeýmizdiń ursysyp jatqanymyz túsirilgen beınejazbany kórsetýdi bastapty. Ol maǵan qol kóterip, sony telefonǵa túsirip alǵan. Sol áreketinen bir aı buryn meni bıiktigi úsh metr satydan ıterip jiberip, artynsha ıtshe tepkilegeni jáne bar. Sodan men bir aı boıy júre almaı qaldym", — delingen áıeldiń jazbasynda.
Áteshova sodan keıin Marattyń ózin balalarymen Túrkııaǵa demalysqa jibergenin aıtady. Ózi elde qalǵan Áıtenov, burynǵy jubaıynyń sózine qaraǵanda, bostandyqty úshinshi ret úılený úshin paıdalanǵanǵa uqsaıdy.
“Ol bizden jasyrynyp úshinshi ret úılengennen keıin esiktiń kiltin aýystyryp, balalarymdy dalada qaldyryp, ózi bal aıyn ótkizý úshin shetelge ushyp ketti”, — deıdi Dana Áteshova.
Sodan keıin kelinshek burynǵy kúıeýiniń mal-múlkin sanap shyǵyp, sonshama baılyqqa ıe adamnyń týǵan balalaryna kómekteskisi kelmeıtinin aıtty. Solaı bola tura, úsh balasy úshin 120 myń teńge alıment alatynyn atap ótken Áteshova bul somanyń az ekenin alǵa tartty.
“Adyrna” ulttyq portaly
