رەسەي اسكەرىنىڭ ۋكرايناعا باسىپ كىرگەنىنە 4 ايعا جۋىقتادى. الەمنىڭ "ەكىنشى اسكەرى" ايتارلىقتاي اسكەري جەتىستىككە جەتپەسە دە، سوعىس زاڭدىلىقتارىن بۇزۋ مەن بەيبىت تۇرعىندارعا قارسى قىلمىس جاساۋ جاعىنان اۋىز تولتىرىپ ايتارلىق "جەتىستىككە" جەتىپ ۇلگەردى.
ۋكراينا ىشكى ىستەر مينيسترلىگىنىڭ اقپاراتىنا سەنسەك، رەسەي اسكەرى ۋكراينا جەرىندە جيىرما مىڭنان استام ادامزاتقا قارسى قىلمىس تۇرلەرىن جاساعان.جاقىندا ۋكراينادا "باسكەسەرلەر كىتابى" پايدا بولادى. بۇل تۋرالى ەل پرەزيدەنتى ۆلاديمير زەلەنسكي 8 ماۋسىمدا مالىمدەدى. وندا رەسەي اسكەرىنىڭ قىلمىستارى مەن ونى جاساعان اسكەري قىلمىسكەرلەردىڭ اتى-ءجونى، جاساعان قىلمىس ءتۇرى جازىلادى.
"قىلمىس جاساۋعا بۇيرىق بەرگەندەردىڭ اتتارىن جازامىز. ناقتى فاكتىلەر، سۋرەتتەر، فوتولار. ۋكراينادا قانداي قىلمىس جاسادى، سونىڭ بارلىعى جازىلاتىن بولادى. بۋچادا، ماريۋپول قالاسىندا. وزگە قالالار مەن ايماقتاردا جاساعان قىلمىستىڭ بارلىعى دا تايعا تاڭبا باسقانداي ناقتى كورسەتىلەدى. ەشكىمدى كەشىرمەيمىز، بارلىعى دا جاۋاپ بەرەتىن بولادى" ، – دەيدى زەلەنسكي.
ۋكراينا قازىردىڭ وزىندە قىلمىس جاساعاندارعا قاتىستى سوت پروتسەسىن باستاپ كەتتى. ەلدىڭ باس پروكۋرورى يرينا ۆەنەديكتوۆانىڭ ايتۋى بويىنشا، قازىر ناقتى 104 ادامعا قاتىستى ءىس اشىلىپ، ونىڭ ىشىندە سەگىز ءىس سوتتا قارالىپ جاتىر دەيدى. ۋكراينا سوتى ءۇش رەسەيلىك ساربازعا سوت ۇكىمىن شىعارىپ ۇلگەردى. ونىڭ ىشىندە 23 مامىر كۇنى سەرجانت ۆاديم ءشيشيماريندى ءومىر بويى باس بوستاندىعىنان ايىرۋ جازاسى كەسىلدى.
ۋكراينا سوتىنا قارسى پروتسەسس رەتىندە سەپاراتيستەر دە ۇكىم شىعارۋدا. مىسالى سەپاراتيستەر قولىنداعى دونەتسك قالاسىندا ۋكراينا ءۇشىن سوعىسۋعا كەلگەن ۇلىبريتانيا ازاماتتارىنا ۇكىم شىقتى. سەپاراتيستەر ءۇش بريتان ازاماتىن ءولىم جازاسىنا كەستى. بۇل شەشىمدى ارينە ۇلىبريتانيا ۇكىمەتى مەن حالىقارالىق ۇيىمدار ايىپتاپ، ولاردى بوساتۋ جولىن قاراستىراتىنىن ايتتى.
رەسەيلىك وپپوزيتسيا وكىلدەرى ۋكراينانىڭ "باسكەسەرلەر كىتابىن" جاساۋىن قولدايدى جانە ونى پۋتين رەجيمىنىڭ نەگىزگى بەينەسى رەتىندە الەمگە كورسەتۋ كەرەك دەگەن ويدا. ولار "پۋتين ءتۇبى بيلىكتەن كەتەدى، ال اسكەري قىلمىسكەرلەر جازاسىن ءتۇبى الادى" دەيدى.
ۋكراينا حالىقارالىق ۇيىمدارمەن بىرلەسە وتىرىپ اسكەري قىلمىسكەرلەرگە تريبۋنال ۇيىمداستىرۋ جاعىن ويلاستىرۋدا. بۇل بويىنشا بۋچا جانە وزگە قالالارعا حالىقارالىق ۇيىمدار مەن ەۋروپا ەلدەرىنىڭ وكىلدەرى كەلىپ، قىلمىس تۇرلەرىنە كوز جەتكىزىپ، قۇجاتقا تۇسىرگەن بولاتىن. بەيرەسمي مالىمەت بويىنشا "بۋچا تريبۋنالى" دەگەن اتاۋمەن قازىر دالەلدەر مەن كۋاگەرلەردەن جاۋاپ الۋ ءجۇرىپ جاتىر. ءبىر عانا بۋچانىڭ وزىندە 16-60 جاس ارالىعىنداعى ەر ازاماتتاردىڭ بارلىعىن ءولتىرۋ فاكتىسى تىركەلگەنى ايتىلۋدا. بۇل تەك قانا اسكەري قىلمىس ەمەس، گەنوتسيد دەپ تانىلىپ، گااگا ارقىلى ءومىر بويى باس بوستاندىعىنان ايىرۋ شەشىمىنە اكەلەتىن قىلمىس تۇرىنە جاتادى.
بۇگىندە باسقىنشىلار قولىنداعى ماريۋپول قالاسىندا 20 مىڭنان استام بەيبىت تۇرعىننىڭ وپات بولعانى جايلى اقپاراتتار بار. ونى عارىشتان تۇسىرگەن سپۋتنيكتىك سۋرەتتەر، مىڭداعان جاڭادان قازىلعان قورىم مەن قالادان ەۆاكۋاتسيالانعان بەيبىت تۇرعىندار راستاپ وتىر. قالا تۇرعىندارىنىڭ 10 پايىزى رەسەي اسكەرىنىڭ باسقىنشىلىعىنان قازا تاپقانى دالەلدەنسە، ءپۋتيننىڭ قالانى قانداي جولمەن بولسا دا الۋ تۋرالى بۇيرىق بەرگەنى ناقتىلانادى دەيدى ساراپشىلار. ماريۋپول قالاسىندا حيميالىق قارۋ ءتۇرىن قولدانۋ فاكتىسى دە بولۋى مۇمكىن، الايدا قالاعا تاۋەلسىز ساراپشىلار كىرە المايتىندىقتان، دالەل تابۋ قيىن.
ۋكراينا رەسەي اسكەرى جاپپاي زورلىق كورسەتۋ مەن توناۋ بويىنشا ورتاعاسىرلىق ادىستەردى قولدانعانىن ايتىپ وتىر. ال بۇگىنگى تاڭدا باسقىنشىلار قولىنداعى پورتتار مەن قامبالاردان استىقتى رەسەي جەرىنە تاسۋى، الەمدىك استىق تاپشىلىعىنا اكەلىپ، ادامزاتقا جاسالعان قىلمىس بولماق دەيدى.
"ادىرنا" ۇلتتىق پورتالى
