نۇر-سۇلتاندا ماس جۇرگىزۋشىنى توقتاتپاق بولىپ جاراقات العان پوليتسەيگە وردەن تابىستالدى

2338
Adyrna.kz Telegram
فوتو: polisia.kz
فوتو: polisia.kz

ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ ماس جۇرگىزۋشىنى توقتاتىپ، قانشاما تۇرعىنداردىڭ ءومىرى مەن دەنساۋلىعىن قورعاپ قالعان ارحات راكيشەۆكە پرەزيدەنت جارلىعىمەن ءىى دارەجەلى "ايبىن" وردەنىن تابىستادى. بۇل تۋرالى  Polisia.kz جاريالادى، دەپ حابارلايدى “ادىرنا” ۇلتتىق پورتالى

"جاساعان ەرلىگىڭ ءۇشىن II دارەجەلى "ايبىن" وردەنىمەن ناگرادتالدىڭ. سول ناگراداڭدى ءمينيستردىڭ تاپسىرماسىمەن ءوزىڭنىڭ كوكىرەگىڭە ىلۋگە كەلىپ وتىرمىن، ارحات باتىر", – دەدى ۆيتسە-مينيستر.

ەسكە سالايىق، نۇر-سۇلتان قالاسى پد مامانداندىرىلعان پاترۋلدىك پوليتسيا باتالونىنىڭ قىزمەت اعا ينسپەكتورى وتكەن جىلدىڭ جەلتوقسان ايىندا اسقان ەرلىك كورسەتىپ، جول قاۋىپسىزدىگىن ساقتاپ قالعان بولاتىن. ول ەلوردانىڭ قوشقارباەۆ كوشەسىندە ەرەجەنى ورەسكەل بۇزىپ، اپاتتى جاعداي تۋدىرىپ كەلە جاتقان جۇك كولىگىن بايقايدى. ەر ادام ءتارتىپ ساقشىسىنىڭ تالاپتارىنا باعىنباي، قوزعالىسىن جالعاستىرماق بولادى. قايعىلى جاعدايدىڭ الدىن الماق بولعان ارحات سول ساتتە اۋىر جاراقات الادى.

پوليتسيا كاپيتانىنا ەكى رەت وتا جاسالعان. كومادا بولعان جىگىت بۇگىندە ەسىن جيعان. بىراق ول ارى قاراي دا ەمىن جالعاستىراتىن بولادى.

"مەكتەپتى "التىن بەلگىگە" ءبىتىردى. ودان كەيىن ەۋرازيا ۇلتتىق ۋنيۆەرسيتەتىنە ءتۇستى. سول ۋنيۆەرسيتەتتى دە جاقسى ءتامامدادى. ودان كەيىن اكادەمياسىن وقىدى. ءوزىنىڭ ارمانى بولاتىن. جۇمىسقا ورنالاستى. ەندى سول ارمانىنا جەتتى دەپ وتىر ەدىك… پوليتسيا جۇمىسى – وتە اۋىر جۇمىس. ەلدىڭ اماندىعىن ويلايتىن جۇمىس قوي. بارلىعى بالاڭىز ەرلىك جاسادى دەپ جازىپ جاتىر. بالامنىڭ ەرلىك جاساعانىنا قۋانامىن. ەل ازاماتى بولعانىنا قۋانامىن”، – دەدى ارحاتتىڭ اناسى الما راكيشەۆا.

”ادىرنا” ۇلتتىق پورتالى

پىكىرلەر