ماڭعىستاۋ وبلىسىنىڭ اۋىل شارۋاشىلىعى باسقارماسى باستىعىنىڭ ورىنباسارى پارا الدى دەپ ايىپتالدى. ول اقشاعا شارۋا قوجالىقتارىنا كۇن پانەلدەرىن ورناتۋعا سۋبسيديا الۋعا كومەكتەسۋگە ۋادە ەتكەن، دەپ حابارلايدى «ادىرنا» ۇلتتىق پورتالى.
"لادا" باسىلىمىنىڭ جازۋىنشا، شەنەۋنىك 2019-2020 جىلدار ارالىعىندا جالپى سوماسى 705 مىڭ تەڭگە كولەمىندە پارا العان.قىلمىستىق ءىستىڭ ەكىنشى فيگۋرانتى مەملەكەتتەن سۋبسيديا الۋ ماقساتىندا qoldau پورتالىنا جالعان شارتتار ەنگىزىپ، ساتىپ الىنعان تاۋارلاردىڭ ناقتى قۇنىنان باعانى جوعارىلاتىپ كورسەتكەن. مەملەكەتكە كەلتىرىلگەن ماتەريالدىق شىعىن 6 ملن 903 مىڭ 275 تەڭگەنى قۇرادى.
سوت ۇكىمىمەن وڭىرلىك اۋىل شارۋاشىلىعى باسقارماسى باستىعىنىڭ ورىنباسارى كىنالى دەپ تانىلدى. وعان العان پارانىڭ 40 ەسەلەنگەن كولەمىندە، ياعني مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ، 28 ملن 200 مىڭ تەڭگە مولشەرىندە ايىپپۇل سالىندى.
ونىڭ سەرىكتەسىنە ءۇش جىلعا شارتتى مەرزىم بەرىلىپ، پروباتسيالىق باقىلاۋ ورناتىلدى.
تاعى ەكى سوتتالۋشى 367-باپتىڭ 2-بولىگى "لاۋازىمدى ادامعا ايتارلىقتاي مولشەردە پارا بەرۋ" بويىنشا جازاعا تارتىلدى. ولارعا پارا سوماسىنىڭ 20 ەسەلەنگەن مولشەرىندە ايىپپۇل سالىنۋى مۇمكىن.
«ادىرنا» ۇلتتىق پورتالى.
