جامبىل وبلىسىنداعى اسكەري بولىمدەگى ساربازدىڭ ولىمىنە كۇدىكتى رەتىندە ۇستالعان ايبولات امانجولوۆتىڭ تۋىستارى اشتىق جاريالادى. بۇل تۋرالى «اق جايىق» باسىلىمى جاريالادى، دەپ حابارلايدى “ادىرنا” ۇلتتىق پورتالى.
ايبولات امانجولوۆتىڭ اتا-اناسى التى بالاسىن ەرتىپ اتىراۋ وبلىستىق قورعانىس ىستەرى جونىندەگى دەپارتامەنتى الدىنا جينالدى. ولاردىڭ ايتۋىنشا، ۇلدارىن ەشكىمگە ايتپاستان قورداي اۋداندىق پوليتسيا بولىمىنەن الماتىداعى تەرگەۋ يزولياتورىنا اۋىستىرىپ جىبەرگەن.
«ۇلىمدى ەشكىمگە ايتپاستان الماتىداعى تەرگەۋ يزولياتورىنا اۋىستىرىپ جىبەرگەن. ءتىپتى قورعاۋشىسى دا بىلمەگەن. ەندى ۇلىمىزدىڭ ءولى-ءتىرى ەكەنىن بىلمەيمىز. قىسىم جاسالىپ جاتقان بولار، ونى دا بىلمەي وتىرمىز. زاڭدى وكىلدەرىمەن كەزدەستەرمەسە، دەمەك، بۇل ىستە ءبىر گاپ بار!» – دەيدى ساربازدىڭ اناسى اينۇر تولەمىسوۆا كوزىنە جاس الىپ.
اينۇر تولەمىسوۆانىڭ ايتۋىنشا، ۇلىمەن بىرگە اسكەرگە بارعاندار انت قابىلداپ، قازىر اسكەري بورىشتارىن وتەۋگە كىرىسكەن. ساربازدىڭ اناسى ايبولاتتىڭ قاسىنداعى ساربازدار ونىڭ جازىقسىز ەكەنىن ايتقانىمەن، ەندى كۋاگەرلىك سوزدەرىن وزگەرتۋى مۇمكىن دەپ قورقىپ وتىر.
«ولار انت قابىلداعاننان كەيىن باسشىلىق تاراپىنان قىسىم بولۋى مۇمكىن. ۇلىم تەرگەۋ يزولياتورىندا وتىر. قاسىنا بۇرىن قىلمىس ىستەپ، 10 جىل تۇرمەگە وتىرىپ شىققان ادامدى وتىرعىزعان. ول ۇلىما قىلمىستى موينىنا الۋعا كەڭەس بەرگەن. دەمەك، ول دا اسكەري تەرگەۋشىلەردىڭ ادامدارى»، - دەيدى انا.
ساربازدىڭ اشتىق جاريالاعان اتا-اناسى، زەينەتكە شىققان اجەسى مەن باۋىرلارى ايبولاتتى اتىراۋعا الىپ كەلمەيىنشە، دەپارتامەنتتىڭ الدىنان كەتپەيتىنىن ايتتى.
«قىلمىستىق ءىس تۋرالى جاق اشپاي وتىر. ۇلىم ءالى اسكەري ادام ەمەس. دەمەك، ونى اتىراۋداعى تەرگەۋ يزولياتورىنا اۋىستىرۋعا بولادى. ونى الىپ كەلسە عانا، اشتىقتى توقتاتامىز»، - دەيدى اينۇر تولەمىسوۆا.
اتىراۋ وبلىستىق قورعانىس ىستەرى جونىندەگى دەپارتامەنتى باستىعىنىڭ ورىنباسارى ەرجان جۇمانوۆتىڭ ايتۋىنشا، ايبولات امانجولوۆ بارلىق مەديتسينالىق، پسيحولوگيالىق سىناقتاردان ءساتتى وتكەن.
«بىزدەن ونىڭ جەكە ءىسىن سۇراتتى. قولىمىزدا بار قۇجاتتى جىبەردىك. ول مەديتسينالىق، پسيحولوگيالىق سىناقتاردان جاقسى ءوتتى. پوليتسيا ەسەبىندە تۇرماعان. قازىر ءىس تەرگەلىپ جاتىر»، - دەدى ەرجان جۇمانوۆ.
بەلسەندى لۋنارا ماكسۋتوۆانىڭ ايتۋىنشا، بۇل ىستە ءۇش كۇدىكتى بار. بىراق ەرجان جۇمانوۆ ول تۋرالى بىلمەيتىنىن ايتتى، ال ساربازدىڭ وتباسى بۇل اقپاراتتى راستاپ وتىر. اشتىق جالعاسىپ جاتىر.
ايبولات امانجولوۆ – وتباسىنداعى جەتى بالانىڭ ەڭ ۇلكەنى. ەڭ كىشى ءىنىسى 1,5 جاستا. ايبولات اتىراۋ بيزنەس جانە زاڭ كوللەدجىندە ءبىلىم الا ءجۇرىپ، داياشى، كەيىن مەيرامحانادا كۇزەتشى بولىپ جۇمىس ىستەگەن. تۋىستارى ايبولات ماڭعىستاۋ وبلىسى بويىنشا اسكەرگە شاقىرۋ جونىندەگى كوميسسيادان العاش رەت وتكەندە كوزىنىڭ ناشار كورۋىنە بايلانىستى اسكەري قىزمەتكە جارامسىز دەپ تانىلعانىن ايتادى. الايدا ارتىنشا 3 ميلليون تەڭگە ايىپپۇل سالامىز دەپ قورقىتىپ، جۇمىسىنان الىپ كەتكەن. اسكەرگە كەتكەن اتىراۋلىق جىگىت وسىلايشا جامبىل وبلىسىنان ءبىر-اق شىعادى.
ەسكە سالايىق، ايبولات قايتىس بولعان ساربازبەن بىرگە 13 ساۋىردە اسكەري قىزمەتىن باستاعان. الايدا ولار اسكەري انت قابىلداپ تا ۇلگەرمەدى. قايعىلى وقيعا 22 ءساۋىر كۇنى تاڭەرتەڭ بولعان. قاتارداعى سارباز الىبەك قالباي ىشكى جاساق كەزىندە ەسىنەن تانىپ قۇلاپ قالعان. الايدا وتار اۋىلىنداعى گۆارديا اسكەري قالاشىعىنىڭ اسكەري گوسپيتالىنە جەتكىزىلگەنىمەن، ءا. قالباي ەسىن جيماستان قايتىس بولادى. كەيىن سوت-مەديتسينالىق ساراپشىلار ونىڭ باسىنىڭ ارتقى جاعىنىڭ، وڭ جاق سان ايماعىنىڭ، باۋىرى مەن وڭ بۇيرەگىنىڭ ءىسىپ كەتكەنىن انىقتادى.
وسى وقيعاعا قاتىستى اتىراۋدان اسكەرگە جاڭا شاقىرىلعان كۇدىكتى ايبولات امانجولوۆ ۇستالدى. ءىس قر قىلمىستىق كودەكسىنىڭ 440-بابى 4-بولىگى بويىنشا («اسكەري قىزمەتشىلەر اراسىنداعى ادام ولىمىنە اكەپ سوققان جارعىلىق ەرەجەلەردى بۇزۋ») تەرگەلىپ جاتىر.
”ادىرنا” ۇلتتىق پورتالى
