قازاقستان رەسپۋبليكاسىنىڭ ىشكى ىستەر مينيسترلىگى اتىراۋ وبلىسىندا تىركەلگەن اسا اۋىر قىلمىس بويىنشا كۇدىكتىنىڭ شەتەلدە ۇستالعانىن مالىمدەدى، دەپ حابارلايدى "ادىرنا" ۇلتتىق پورتالى.
رەسمي اقپاراتقا سايكەس، كۇدىكتى يندونەزيا رەسپۋبليكاسىنىڭ لومبوك ارالىنداعى سەنارۋ ەلدى مەكەنىندە حالىقارالىق ارىپتەستەرمەن بىرلەسكەن جەدەل-ىزدەستىرۋ شارالارى ناتيجەسىندە انىقتالىپ، ۇستالعان. ول قر قىلمىستىق كودەكسىنىڭ 99-بابى 2-بولىگى بويىنشا جاۋاپقا تارتىلۋى مۇمكىن.
سونداي-اق، اتالعان تۇلعامەن بىرگە بۇعان دەيىن حابار-وشارسىز كەتكەن رەتىندە حالىقارالىق ىزدەۋدە بولعان ايەلدىڭ جۇرگەن جەرى انىقتالعان. پوليتسيا دەرەگىنشە، ول قازا تاپقانداردىڭ ءبىرىنىڭ قىزى بولىپ شىقتى. قالعان ەكى بالاعا ىزدەۋ جاريالانعان.
تەرگەۋ مالىمەتتەرى بويىنشا، 2025 جىلدىڭ قاراشا ايىندا كۇدىكتى پايداكۇنەمدىك نيەتپەن جانە تۇرمىستىق جانجالدار نەگىزىندە ەكى ادامدى قاساقانا ولتىرگەن. قىلمىستى جاسىرۋ ماقساتىندا مايىتتەردى شارۋاشىلىق نىسانىنىڭ استىنا جاسىرعان، سونداي-اق دالەلدەمەلەردى جويۋعا ارەكەت جاساعان جانە جابىرلەنۋشىلەردىڭ مۇلكىن يەمدەنگەن.
قازىرگى ۋاقىتتا كۇدىكتىنى قازاقستانعا قايتارۋ ماسەلەسى قارالۋدا.
