رەسەي پرەزيدەنتى ۆلاديمير پۋتين ساۋىردە قاتەرلى ىسىكتىڭ ۇدەمەلى تۇرىنەن ەمدەلدى. بۇل تۋرالى اقش بارلاۋ قىزمەتىنىڭ قۇپيا بايانداماسىندا ايتىلعان، كەيىن Newsweek جۋرنالى جاريالادى، دەپ حابارلايدى “ادىرنا” ۇلتتىق پورتالى.
باسىلىم مالىمەتىنشە، باياندامادا ناۋرىزدا پۋتينگە قاستاندىق جاسالعانى دا ايتىلعان.
ء"پۋتيننىڭ بيلىگى مىقتى. ونىڭ كرەملدەگى بۇكىل بيلىگى كەزىندە بۇرىن-سوڭدى مۇنداي قىزۋ كۇرەس بولعان ەمەس، ءبارى ونىڭ بيلىگى اياقتالۋعا جاقىن ەكەنىن سەزەدى", - دەيدى جۋرنالعا سۇحبات بەرگەندەردىڭ ءبىرى.
سونىمەن قاتار، ءۇش اقپارات كوزى دە رەسەي باسشىسىنىڭ وقشاۋلانۋى اقش بارلاۋ اگەنتتىكتەرىنىڭ ءپۋتيننىڭ دەنساۋلىعىنا ناقتى باعا بەرۋىن قيىنداتاتىنىن، شەتەلدىك ليدەرلەرمەن كەزدەسۋلەرىنىڭ ازايۋى، بەتپە-بەت كەزدەسۋلەر ارقىلى الىناتىن اقپاراتتاردى توقتاتاتىنىن ايتتى.
ء"پۋتيننىڭ وقشاۋلانۋى ول تۋرالى اقپارات الۋدى قيىنداتتى", - دەدى ول.
سوڭعى ايلاردا ۋكرايناداعى سوعىس قارساڭىندا ءپۋتيننىڭ دەنساۋلىعى ناشار دەگەن بولجام باق-تا بىرنەشە رەت جاريالاندى. 2022 جىلدىڭ مامىرىندا پۋتينمەن جەكە جۇمىس ىستەگەن رەجيسسەر وليۆەر ستوۋن رەسەي پرەزيدەنتىنىڭ قاتەرلى ىسىك اۋرۋىمەن اۋىراتىنى تۋرالى حابارلادى. Proekt باسىلىمى ءپۋتيندى ساپارلاردا ونكولوگيالىق اۋرۋدى ەمدەيتىن دارىگەرلەر توبى الىپ جۇرەتىنىن جازدى.
29 مامىردا رەسەي سىرتقى ىستەر ءمينيسترى سەرگەي لاۆروۆ فرانتسۋزدىڭ TF1 تەلەارناسىنا بەرگەن سۇحباتىندا ءپۋتيننىڭ دەنساۋلىعى ناشار دەگەن اقپاراتتى جوققا شىعاردى.
”ادىرنا” ۇلتتىق پورتالى
