ورمان شارۋاشىلىعى جانە جانۋارلار دۇنيەسى كوميتەتى كيىكتەردىڭ مۇيىزدەرىن تاڭبالاۋ ەرەجەلەرىن ازىرلەدى. قۇجات 2022 جىلعى 16 ماۋسىمعا دەيىن «اشىق نقا» سايتىندا ورنالاستىرىلعان، دەپ حابارلايدى “ادىرنا” ۇلتتىق پورتالى.
ەرەجەگە سايكەس، كيىكتەردىڭ مۇيىزدەرىن تاڭبالاۋعا ارنالعان بۇيىم (QR-كود) وندا تىركەلگەن دەرەكتەر نەگىزىندە كيىكتەردىڭ مۇيىزدەرىن سايكەستەندىرۋ، ەسەپكە الۋ ءۇشىن بىرىڭعاي اقپاراتتىق جۇيەمەن دايىندالادى.
ورمان شارۋاشىلىعى جانە جانۋارلار دۇنيەسى كوميتەتى كيىكتەردىڭ مۇيىزدەرىن ساتۋدى جۇزەگە اسىراتىن مەملەكەتتىك مونوپوليا سۋبەكتىلەرىنىڭ ءوتىنىشى نەگىزىندە بۇيىمداردى بەرەدى.
كيىكتەردىڭ ءمۇيىزىن قازاقستان رەسپۋبليكاسىنان تىس جەرلەرگە شىعارعىسى كەلەتىن مەملەكەتتىك مونوپوليا سۋبەكتىسى قۇرىپ كەتۋ قاۋپى تونگەن جابايى فاۋنا مەن فلورا تۇرلەرىمەن حالىقارالىق ساۋدا تۋرالى كونۆەنتسيانىڭ كۇشى قولدانىلاتىن دەريۆاتتار ەل اۋماعىنان ەكسپورتتاۋعا نەمەسە كەرى ەكسپورتتاۋعا رۇقسات الۋعا ءوتىنىش بەرەدى.
رۇقساتتى اكىمشىلىك ورگان قۇرىپ كەتۋ قاۋپى تونگەن جابايى فاۋنا مەن فلورا تۇرلەرىمەن حالىقارالىق ساۋدا تۋرالى كونۆەنتسيانىڭ كۇشى قولدانىلاتىن جانۋارلار تۇرلەرىن قازاقستان رەسپۋبليكاسىنىڭ اۋماعىنا يمپورتتاۋعا، ەكسپورتتاۋعا نەمەسە كەرى ەكسپورتتاۋعا رۇقسات بەرۋ قاعيدالارىنا سايكەس بەرەدى.
بۇيىمنىڭ جەكە ەسەپتىك ءنومىرى رۇقساتتامادا كورسەتىلەدى.
بۇيىمدى مەملەكەتتىك مونوپوليا سۋبەكتىسىنىڭ مامانى كيىكتىڭ ءمۇيىزى بار ءاربىر ۆاكۋمدىق پاكەتتىڭ ىشىنە ونى كوزبەن شولىپ قاراۋدى قامتاماسىز ەتەتىن جانە قايتا پايدالانۋدى بولدىرمايتىن تاسىلمەن جەلىمدەيدى.
تاڭبالانعان بۇيىمدا كەلەسى اقپارات قامتىلادى: ءمۇيىزدىڭ جەكە ەسەپتىك ءنومىرى، كودى، كيىكتىڭ پوپۋلياتسياسى، ءمۇيىزدىڭ ساتىپ الىنعان كۇنى، ءمۇيىزدىڭ ۆەتەريناريالىق-سانيتاريالىق ساراپتاماسىنىڭ ءنومىرى مەن كۇنى، بۇيىمنىڭ ءنومىرى، بۇيىمنىڭ بەرىلگەن كۇنى.
”ادىرنا” ۇلتتىق پورتالى
