بۇگىن 1 ماۋسىم — بالالاردى قورعاۋ كۇنىنە وراي الماتى اكىمدىگىنىڭ ۇيىمداستىرۋىمەن بوتانيكالىق باقتا ۇلكەن ءىس-شارا ءوتتى. كىتاپ كورمەسىندە جاۋاپتى بولۋ ماعان مىندەتتەلدى.
مەملەكەت باسشىسىنىڭ الدىندا سويلەگەن ءسوزىم تومەندەگىدەي:
"ارمىسىز، قۇرمەتتى قاسىم-جومارت كەمەلۇلى!
مەن، ەرجان جۇمابەكۇلى. «كىتاپ — ءبىلىم بۇلاعى» سايىسىنىڭ قالالىق كەزەڭىندە قازىلار القاسىندا توراعالىق ەتكەن ەدىم. بالالاردىڭ كىتاپ وقۋعا دەگەن، كونكۋرسقا دەگەن قىزىعۋشىلىقتارى مەنى ءتانتى ەتتى. جاس بۋىننىڭ جاڭا قازاقستاندا وزدەرىن بارلىق جاعىنان تانىتۋعا مۇمكىندىكتەرىنىڭ مول ەكەنى قۋانتادى. وسى ءۇردىس جالعاسىن تاۋىپ، رۋحاني باي بالالارىمىزدىڭ سانى كوبەيە بەرسىن.
قازاق ءتىلىن جوعارى دارەجەدە ناسيحاتتاپ جۇرگەن كولەمدى شىعارمالارعا دەگەن كوڭىلى ەرەكشە №187 مەكتەپتىڭ 11-ءشى سىنىپ وقۋشىسى شۋت ميحايلدىڭ «الپامىس باتىر» جىرىن جاتقا ايتۋى مەنى تاڭعالدىردى.
ميحايل مەملەكەتتىك ءتىلىمىزدىڭ مارتەبەسىن ارتتىرۋعا وزىندىك ۇلەسىن قوسىپ جۇرگەن وقۋشى رەتىندە وزگە بالالارعا ۇلگى بولارى انىق. وسىنداي دارىندى جاستاردى ەل الدىنا كوبىرەك شىعارسا، باسقا وقۋشىلاردىڭ كىتاپ وقۋعا قىزىعۋشىلىقتارى ءتىپتى ارتا تۇسەتىنىنە سەنىمدىمىن. ءوزىڭىز بىلەسىز، رۋحانيات بارىنەن بيىك تۇرادى.
رۇقساتىڭىزبەن ميحايلدى جىردان ءۇزىندى وقىپ بەرۋگە شاقىرامىن."
شارا بارىسىندا پرەزيدەنتىمىزگە بالالار ادەبيەتى مەن اۋدارما سالاسىنىڭ دامىپ كەلە جاتقانىن، گارري پوتتەر دە قازاق تىلىندە سويلەگەنىن ايتىپ،
زاۋرە تورەحان مەن ەكاتەرينا لي سياقتى جاس جازۋشىلارعا جانە ىڭكار، نۇريليا، ەرنۇر جانە رايانا دەگەن تالانتتى بالالارعا دا توقتالدىم. ولار كوشباسشىمىزعا ونەرلەرىن كورسەتىپ، ارمان-تىلەكتەرىن ايتتى.
وسىنداي تاماشا مەرەكەلىك كەشتى ۇيىمداستىرعان الماتى اكىمدىگىنە، اسىرەسە، قالا اكىمىنىڭ ورىنباسارى اسەم بەكقىزىنا ەرەكشە العىسىمدى بىلدىرەمىن!
ەل يگىلىگى ءۇشىن ايانباي قىزمەت ەتە بەرىڭىزدەر.
جاقسىلىقتا عانا جۇزدەسەيىك!
ەرجان جۇمابەكۇلى
اقىن، سازگەر، ءانشى، قازاقستان جازۋشىلار وداعىنىڭ مۇشەسى، «قازاقستاننىڭ 100 جاڭا ەسىمى» جوباسىنىڭ جەڭىمپازى، سەرپەر سىيلىعىنىڭ يەگەرى، دوكتورانت (تۇركيادا ءبىلىم الىپ جاتىر)
