Búgin 1 maýsym — Balalardy qorǵaý kúnine oraı Almaty ákimdiginiń uıymdastyrýymen Botanıkalyq baqta úlken is-shara ótti. Kitap kórmesinde jaýapty bolý maǵan mindetteldi.
Memleket basshysynyń aldynda sóılegen sózim tómendegideı:
"Armysyz, qurmetti Qasym-Jomart Kemeluly!
Men, Erjan Jumabekuly. «Kitap — bilim bulaǵy» saıysynyń qalalyq kezeńinde qazylar alqasynda tóraǵalyq etken edim. Balalardyń kitap oqýǵa degen, konkýrsqa degen qyzyǵýshylyqtary meni tánti etti. Jas býynnyń Jańa Qazaqstanda ózderin barlyq jaǵynan tanytýǵa múmkindikteriniń mol ekeni qýantady. Osy úrdis jalǵasyn taýyp, rýhanı baı balalarymyzdyń sany kóbeıe bersin.
Qazaq tilin joǵary dárejede nasıhattap júrgen kólemdi shyǵarmalarǵa degen kóńili erekshe №187 mekteptiń 11-shi synyp oqýshysy Shýt Mıhaıldyń «Alpamys batyr» jyryn jatqa aıtýy meni tańǵaldyrdy.
Mıhaıl memlekettik tilimizdiń mártebesin arttyrýǵa ózindik úlesin qosyp júrgen oqýshy retinde ózge balalarǵa úlgi bolary anyq. Osyndaı daryndy jastardy el aldyna kóbirek shyǵarsa, basqa oqýshylardyń kitap oqýǵa qyzyǵýshylyqtary tipti arta túsetinine senimdimin. Ózińiz bilesiz, rýhanııat bárinen bıik turady.
Ruqsatyńyzben Mıhaıldy jyrdan úzindi oqyp berýge shaqyramyn."
Shara barysynda Prezıdentimizge balalar ádebıeti men aýdarma salasynyń damyp kele jatqanyn, Garrı Potter de qazaq tilinde sóılegenin aıtyp,
Záýre Tórehan men Ekaterına Lı sııaqty jas jazýshylarǵa jáne Ińkár, Nurılıa, Ernur jáne Raıana degen talantty balalarǵa da toqtaldym. Olar Kóshbasshymyzǵa ónerlerin kórsetip, arman-tilekterin aıtty.
Osyndaı tamasha merekelik keshti uıymdastyrǵan Almaty ákimdigine, ásirese, qala ákiminiń orynbasary Ásem Bekqyzyna erekshe alǵysymdy bildiremin!
El ıgiligi úshin aıanbaı qyzmet ete berińizder.
Jaqsylyqta ǵana júzdeseıik!
Erjan Jumabekuly
aqyn, sazger, ánshi, Qazaqstan Jazýshylar odaǵynyń múshesi, «Qazaqstannyń 100 jańa esimi» jobasynyń jeńimpazy, Serper syılyǵynyń ıegeri, doktorant (Túrkııada bilim alyp jatyr)
