ايىپتاۋشى تاراپ 14 ناۋرىزعا دەيىن Twitter اكتسيالارىنىڭ 5%-دان استامىن ساتىپ العانى تۋرالى ەشكىمگە ايتپاعان ماسك 14 ميلليون دوللار ۇنەمدەگەنىن دالەلدەگىسى كەلەدى، دەپ حابارلايدى CNBC.
تالاپكەرلەر مامىلە تۋرالى حابارلانعاننان بەرى Twitter اكتسيالارى 12%-عا، ال Tesla اكتسيالارى 28% - عا تومەندەگەنىن ايتادى. سالدارىنان اكتسيا يەلەرى وزدەرىنىڭ الەۋەتتى كىرىستەرىنىڭ 40%-ىن جوعالتتى. ماسكتى Twitter اكتسيالارىن ساتىپ العانى تۋرالى مالىمەتتى ادەيى جاسىردى دەپ ايىپتايدى: ءساۋىر ايىنىڭ باسىندا ول كومپانيانىڭ 9,2% اكتسياسىنا يە بولدى، وسىلايشا ول 150 ميلليون دوللاردان استام اقشاسىن "ۇنەمدەدى".
تالاپكەرلەر نارىققا مانيپۋلياتسيا جاساۋ كاليفورنيانىڭ كورپوراتيۆتىك زاڭناماسىن بۇزۋ بولىپ تابىلاتىنىن اتاپ ءوتتى.
ينۆەستورلار ماسك ءوز ءىس-ارەكەتتەرى كەزىندە كومپانيا ديرەكتورلارىنىڭ قۇپيا اقپاراتىن نەگىزگە العانىنا سەنىمدى. جەلىنىڭ نەگىزىن قالاۋشى دجەك دورسي مەن ديرەكتورلار كەڭەسىنىڭ ءبىر مۇشەسى ەگون دۋربان ينسايدەرلىك مالىمەتتەردى جاريا ەتتى دەپ ايىپتالادى. وسىعان بايلانىستى اكتسيونەرلەر دۋرباننىڭ وكىلەتتىگىن ارى قاراي ۇزارتپاۋدى قولداپ، داۋىس بەردى، ال دورسي ءوز ەركىمەن كومپانيادان كەتەتىنىن مالىمدەدى.
تالاپ قويۋشىلار سوتتان ماسكتى وزدەرىنە سوماسى اشىپ ايتىلماعان شىعىنداردى وتەۋگە، سونداي-اق ايىپپۇل تولەۋگە مىندەتتەۋدى تالاپ ەتتى.
سونىمەن قاتار، اقش-تىڭ باعالى قاعازدار جانە بيرجالار جونىندەگى كوميسسياسى ماسكتىڭ Twitter اكتسيالارىن ساتىپ العانى تۋرالى مالىمەتتەردى ۋاقتىلى جاريالاماي، جاسىرىن ۇستاۋ فاكتىسى بويىنشا تەرگەۋ جۇرگىزەدى.
"ادىرنا" ۇلتتىق پورتالى.
