الەمدە جاڭا مايمىل شەشەگى دەپ اتالاتىن ۆيرۋستىڭ تارالۋ قاۋىپى جوعارى. قازاقستاندىق عالىمدار مايمىل شەشەگىنە قارسى وتاندىق ۆاكتسينا جاساپ شىعۋعا جارتى جىلداي ۋاقىت كەتەتىندىگىن ايتتى. بۇل تۋرالى 24.kz ارناسى جاريالادى، دەپ حابارلايدى “ادىرنا” ۇلتتىق پورتالى.
قازىر الەمنىڭ 14 ەلىندە 200-دەن استام ادام وسى ۆيرۋستى جۇقتىرعان. بۇل قاۋىپتى ۆيرۋس قازاقستانعا كەلۋى دە مۇمكىن دەيدى ماماندار.
«ءيا، مايمىل شەشەگىنىڭ قازاقستانعا كەلۋ قاۋپى جوعارى. ويتكەنى ءبىزدىڭ تۋريستەر ساۋد ارابياسىنا، تۇركياعا نەمەسە افريكا مەن وزگە دە ەلدەرگە ءجيى بارادى. سوندىقتان جامان ايتپاي جاقسى جوق. قاۋىپتى ۆيرۋس كەلە قالعان جاعدايدا ءبىز ءتاستۇيىن دايىن بولۋىمىز كەرەك»، – دەيدى بيولوگيالىق قاۋىپسىزدىك ماسەلەلەرى عزي اسا قاۋىپتى ينفەكتسيالار زەرتحاناسىنىڭ مەڭگەرۋشىسى لەسبەك قۇتىمبەتوۆ.
قازاق بيولوگيالىق قاۋىپسىزدىك ماسەلەلەرى عىلىمي زەرتتەۋ ينستۋتۋتىنىڭ ماماندارى كوروناۆيرۋسقا قارسى وتاندىق ۆاكتسينانى ويلاپ تاپقان.
قازاقستاندىق عالىمدار ەندى مايمىل شەشەگى ماسەلەسىن ەرتەرەك قولعا الۋدى كوزدەپ وتىر. ويتكەنى دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا مايمىل شەشەك ۆيرۋسى مۋتاتسياعا ۇشىراپ، ادامنان ادامعا جۇعۋ قابىلەتىنە يە بولعان.
«ءبىزدىڭ ينستيتۋت شەشەك ۆيرۋستارىمەن كوپ جىلداردان بەرى اينالىسادى. سوندىقتان تاجىريبە جەتكىلىكتى. ماسەلەن، سيىر شەشەك جانە مايمىل شەشەك ءبىر توپ دەسەك، ولاردىڭ اراسىندا يممۋندىق انتيگەن بايلانىسى بار. سوندىقتان ءبىر ۆيرۋس باسقا ۆيرۋسقا قارسى يممۋنيتەتتى وڭاي جاساي الادى. مىسالى، سيىر ۆيرۋسىنىڭ شەشەك اۋرۋىنا قارسى يممۋنيتەتتى قۇرۋداعى بەلسەندىلىگى وتە جوعارى»، – دەپ اتاپ ءوتتى عالىم.
ماماندار مايمىل شەشەگىنە قارسى ۆاكتسينانى 6 ايدىڭ ىشىندە جاساپ شىعا الاتىندىعىن ايتتى.
«ەگەر سيىر ۆيرۋسىنا نەگىزدەلگەن ۆاكتسينا بولسا، وندا جەدەلدەتىلگەن تۇردە، ال كوۆيد-19 كەزىندەگىدەي جۇمىس ىستەسەك 6 ايدا ۆاكتسينانى دايىنداپ شىعۋعا بولادى. ودان كەيىن كلينيكاعا دەيىنگى جانە كلينيكالىق سىناقتار بار. ياعني دەنساۋلىق ساقتاۋ مينيسترلىگىنە دە بايلانىستى بولادى. ماسەلە ولاردىڭ بىزگە قانشالىقتى قولداۋ كورسەتۋىندە»، – دەيدى عىلىمي-زەرتتەۋ ينستيتۋتىنىڭ زەرتحانا مەڭگەرۋشىسى.
”ادىرنا” ۇلتتىق پورتالى
