Álemde jańa maımyl sheshegi dep atalatyn vırýstyń taralý qaýipi joǵary. Qazaqstandyq ǵalymdar maımyl sheshegine qarsy otandyq vakına jasap shyǵýǵa jarty jyldaı ýaqyt ketetindigin aıtty. Bul týraly 24.kz arnasy jarııalady, dep habarlaıdy “Adyrna” ulttyq portaly.
Qazir álemniń 14 elinde 200-den astam adam osy vırýsty juqtyrǵan. Bul qaýipti vırýs Qazaqstanǵa kelýi de múmkin deıdi mamandar.
«Iá, maımyl shesheginiń Qazaqstanǵa kelý qaýpi joǵary. Óıtkeni bizdiń týrıster Saýd Arabııasyna, Túrkııaǵa nemese Afrıka men ózge de elderge jıi barady. Sondyqtan jaman aıtpaı jaqsy joq. Qaýipti vırýs kele qalǵan jaǵdaıda biz tastúıin daıyn bolýymyz kerek», – deıdi bıologııalyq qaýipsizdik máseleleri ǴZI asa qaýipti ınfekııalar zerthanasynyń meńgerýshisi Lesbek Qutymbetov.
Qazaq bıologııalyq qaýipsizdik máseleleri ǵylymı zertteý ınstýtýtynyń mamandary koronavırýsqa qarsy otandyq vakınany oılap tapqan.
Qazaqstandyq ǵalymdar endi maımyl sheshegi máselesin erterek qolǵa alýdy kózdep otyr. Óıtkeni Dúnıejúzilik densaýlyq saqtaý uıymynyń málimeti boıynsha maımyl sheshek vırýsy mýtaııaǵa ushyrap, adamnan adamǵa juǵý qabiletine ıe bolǵan.
«Bizdiń ınstıtýt sheshek vırýstarymen kóp jyldardan beri aınalysady. Sondyqtan tájirıbe jetkilikti. Máselen, sıyr sheshek jáne maımyl sheshek bir top desek, olardyń arasynda ımmýndyq antıgen baılanysy bar. Sondyqtan bir vırýs basqa vırýsqa qarsy ımmýnıtetti ońaı jasaı alady. Mysaly, sıyr vırýsynyń sheshek aýrýyna qarsy ımmýnıtetti qurýdaǵy belsendiligi óte joǵary», – dep atap ótti ǵalym.
Mamandar maımyl sheshegine qarsy vakınany 6 aıdyń ishinde jasap shyǵa alatyndyǵyn aıtty.
«Eger sıyr vırýsyna negizdelgen vakına bolsa, onda jedeldetilgen túrde, al kovıd-19 kezindegideı jumys istesek 6 aıda vakınany daıyndap shyǵýǵa bolady. Odan keıin klınıkaǵa deıingi jáne klınıkalyq synaqtar bar. Iaǵnı Densaýlyq saqtaý mınıstrligine de baılanysty bolady. Másele olardyń bizge qanshalyqty qoldaý kórsetýinde», – deıdi ǵylymı-zertteý ınstıtýtynyń zerthana meńgerýshisi.
”Adyrna” ulttyq portaly
