قازاقستان مەن اقش ءوزارا تىكەلەي اۋە قاتىناسىن اشۋدى جوسپارلاپ وتىر. بۇل تۋرالى قر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ توراعاسى تالعات لاستاەۆتىڭ Boeing كومپانياسىنىڭ ۆيتسە-پرەزيدەنتى مونتە فرەيزەرمەن كەزدەسۋىنەن بەلگىلى بولدى، دەپ حابارلادى “ادىرنا” ۇلتتىق پورتالى inform.kz سايتىنا سىلتەپ.
قر يندۋستريچ جانە ينفراقۇرىلىمدىق دامۋ مينيسترلىگى ءباسپاسوز قىزمەتىنىڭ حابارلاۋىنشا، كەزدەسۋدە Boeing 737 MAX جانە 787 Dreamliner اۋە كەمەلەرىن Air Astana جانە SCAT اۋە كومپانيالارىنا جەتكىزۋ ماسەلەلەرى تالقىلاندى. كەيىن ت.لاستاەۆ پەن م.فرەيزەر قر مەن اقش اراسىندا تىكەلەي اۋە قاتىناسىن اشۋ، سونداي-اق قازاقستاندا Boeing كومپانياسىنىڭ جاتتىعۋ جانە تەحنيكالىق ورتالىقتارىن ورنالاستىرۋ مۇمكىندىگىنە قاتىستى ماسەلەلەردى تالقىلادى.
سونداي-اق، ەكى تاراپ Boeing كومپانياسىنىڭ اقش فەدەرالدىق ازاماتتىق اۆياتسيا باسقارماسىنىڭ (FAA) ۇشۋ قاۋىپسىزدىگىن حالىقارالىق باعالاۋىنان (IASA) جەدەل ءوتۋ ءۇشىن قازاقستاننىڭ اۆياتسيالىق اكىمشىلىگىنە وتەۋسىز تەحنيكالىق كومەك بەرۋ جانە قر مەن اقش اراسىنداعى تىكەلەي رەيستى ىسكە قوسۋ ءۇشىن CAT1 مارتەبەسىن الۋ تۋرالى ۋاعدالاستى.
الەمدىك تاجىريبەنى نەگىزگە الاتىن بولساق، ارنايى كونسالتينگتىك كومپانيالاردىڭ تەحنيكالىق تۇرعىدان قولداۋ كورسەتۋىنىڭ ورتاشا قۇنى شامامەن $2-2,5 ملن قۇرايدى.
قول جەتكىزىلگەن ۋاعدالاستىقتار شەڭبەرىندە بيىل مامىر ايىنىڭ ءۇشىنشى ونكۇندىگىندە Boeing ماماندارى نۇر-سۇلتان قالاسىنا كەلەدى.
سونىمەن قاتار، كەزدەسۋگە قاتىسۋشىلار قازاقستاندا ازاماتتىق اۆياتسيا سالاسىنداعى جاس تالانتتارعا ارنالعان Boeing كومپانياسىنىڭ ارنايى وقىتۋ باعدارلاماسىن ۇيىمداستىرۋ تۋرالى كەلىسىمگە قول جەتكىزدى.
”ادىرنا” ۇلتتىق پورتالى
