وتكەن اپتادا "انتيكور" الماتى وبلىسى اۋىل شارۋاشىلىعى باسقارماسىنىڭ بۇرىنعى باسشىسى ماقسۇت جاپاروۆقا قاتىستى ءىس قوزعادى دەگەن اقپارات شىقتى. ول وسىمەن ەكىنشى رەت بيۋدجەت قارجىسىن جىمقىردى دەگەن كۇدىككە ءىلىنىپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى @abzhannews تەلەگرامم كانالى جازدى.
ول العاش رەت شارۋا قوجالىقتارىنا سۋبسيديالاردى نەگىزسىز ەسەپتەدى دەگەن كۇدىككە ءىلىندى. بۇل وتكەن جىلدىڭ تامىز ايىندا بولعان. كەيىن اقتالىپ، كرەسلوسىنا قايتا ورالدى. "جاپاروۆتى "سامۇرىق-قازىنا" قورىنىڭ ەكس-توراعاسى احمەتجان ەسىموۆتىڭ "تۋىسى" دەگەن قاۋەسەت بار. ول وعان ءىستى "شەشۋگە" كومەكتەسكەن-مىس".
ەندى، مىنە، وبلىستىڭ باس اۋىل شارۋاشىلىعى قىزمەتكەرى قىزمەتىن اياقتاعانىنا بىرنەشە اي وتكەن سوڭ، ونىڭ ۇستىنەن تاعى دا ءىس قوزعالدى. بۇل جولى قر قىلمىستىق كودەكسىنىڭ 189-بابى "سەنىپ تاپسىرىلعان بوتەننىڭ مۇلكىن يەمدەنۋ نەمەسە جىمقىرۋ" بويىنشا قىلمىستىق ءىس قوزعالعان.
جاپاروۆ جوعارى باعامەن اۋىل شارۋاشىلىعى تەحنيكاسىن جەتكىزۋ ارقىلى 50 ميلليون تەڭگە بيۋدجەت قاراجاتىن جىمقىردى دەگەن كۇدىككە ىلىنگەن. الايدا الماتى وبلىسىنىڭ سىبايلاس جەمقورلىققا قارسى قىزمەتى اقپاراتقا قاتىستى تۇسىنىكتەمە بەرمەدى. ولار فاكتىنى جوققا شىعارمايدى دا، راستامايدى دا.
"ادىرنا" ۇلتتىق پورتالى.
