5 ماۋسىمدا وتەتىن رەفەرەندۋمدى قوعامدىق قولداۋ جونىندەگى رەسپۋبليكالىق شتاب جانە وڭىرلەردىڭ قوعامدىق شتابتارى رەسپۋبليكا كولەمىندە اقپاراتتىق-ناسيحاتتىق جۇمىستاردى كەڭىنەن جانە بەلسەندى تۇردە جۇرگىزۋدە. وسى ماقساتتا رەسپۋبليكالىق شتاب تۇركىستان قالاسىندا وڭىرارالىق كەزدەسۋ ۇيىمداستىرىپ، وعان وعان رەسپۋبليكالىق «ارداگەرلەر ۇيىمى» قوعامدىق بىرلەستىگىنىڭ توراعاسى، تۇركىستان وبلىسىنىڭ كاسىپكەرلەرى قاتىستى.
جيىندى اشىپ جۇرگىزگەن رەفەرەندۋمدى قوعامدىق قولداۋ جونىندەگى رەسپۋبليكالىق شتابتىڭ جانە «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگىنىڭ توراعاسى تولەۋبەك مۇقاشەۆ مەملەكەتتىك ماڭىزى بار رەفورمانى جۇزەگە اسىرۋ - بۇگىنگى قازاقستاننىڭ عانا ەمەس، كەلەشەك ۇرپاقتىڭ تاعدىرىنا تىكەلەي اسەر ەتەتىن ماڭىزدى ءسات ەكەنىن ايتتى.
«ارداگەرلەر ۇيىمى» قوعامدىق بىرلەستىگىنىڭ توراعاسى باقتىقوجا ىزمۇحامبەتوۆ مەملەكەتتىڭ ماڭىزدى ماسەلەلەرىن حالىق بولىپ شەشۋگە شاقىردى.
ال رەسپۋبليكالىق كاسىپوداق فەدەراتسياسى باسشىسىنىڭ ورىنباسارى نۇرلان وتەشوۆ، تۇركىستان وبلىسى كاسىپكەرلەر پالاتاسىنىڭ ديرەكتورى تيمۋر ناقىپبەكوۆ، «تۇركىستان بولاشاق» بالاباقشا ديرەكتورى، وبلىستىق ءماسليحات دەپۋتاتى شولپان بەگاليەۆا ەل تاريحىندا وتكىزىلەتىن ەكىنشى رەفەرەندۋمعا ءبىر ءۇيدىڭ بالاسىنداي قاتىسۋعا شاقىردى.
تۇركىستان وبلىستىق ءماسليحات حاتشىسى قايرات بالابيەۆ رەفەرەندۋم ماسەلەسىنەن بولەك، كاسىپكەرلەرگە پرەزيدەنت تاراپىنان كورسەتىلەتىن قولداۋىن اتاپ ءوتىپ، كاسىپكەرلەردىڭ ەل ەكونوميكاسىنا قوسقان ۇلەسى، شاعىن جانە ورتا كاسىپكەرلىك نىساندارىنىڭ وزەكتى ماسەلەلەرىن كوتەردى.
بۇدان بولەك جيىنعا قاتىسقان كاسىپ يەلەرى رەسپۋبليكا بويىنشا وتكىزىلەتىن رەفەرەندۋم توڭىرەگىندەگى ماڭىزدى سۇراقتارعا جان-جاقتى جاۋاپ الىپ، بيزنەس توڭىرەگىندە تالقىلاۋعا بەلسەنە قاتىستى.
"ادىرنا" ۇلتتىق پورتالى.
