5 maýsymda ótetin referendýmdy qoǵamdyq qoldaý jónindegi respýblıkalyq shtab jáne óńirlerdiń qoǵamdyq shtabtary respýblıka kóleminde aqparattyq-nasıhattyq jumystardy keńinen jáne belsendi túrde júrgizýde. Osy maqsatta respýblıkalyq shtab Túrkistan qalasynda óńiraralyq kezdesý uıymdastyryp, oǵan oǵan respýblıkalyq «Ardagerler uıymy» qoǵamdyq birlestiginiń tóraǵasy, Túrkistan oblysynyń kásipkerleri qatysty.
Jıyndy ashyp júrgizgen Referendýmdy qoǵamdyq qoldaý jónindegi respýblıkalyq shtabtyń jáne «Qazaqstan máslıhattary depýtattarynyń birlestigi» respýblıkalyq qoǵamdyq birlestiginiń tóraǵasy Tóleýbek Muqashev memlekettik mańyzy bar reformany júzege asyrý - búgingi Qazaqstannyń ǵana emes, keleshek urpaqtyń taǵdyryna tikeleı áser etetin mańyzdy sát ekenin aıtty.
«Ardagerler uıymy» qoǵamdyq birlestiginiń tóraǵasy Baqtyqoja Izmuhambetov memlekettiń mańyzdy máselelerin halyq bolyp sheshýge shaqyrdy.
Al respýblıkalyq kásipodaq federaııasy basshysynyń orynbasary Nurlan Óteshov, Túrkistan oblysy Kásipkerler palatasynyń dırektory Tımýr Naqypbekov, «Túrkistan Bolashaq» balabaqsha dırektory, oblystyq máslıhat depýtaty Sholpan Begalıeva el tarıhynda ótkiziletin ekinshi referendýmǵa bir úıdiń balasyndaı qatysýǵa shaqyrdy.
Túrkistan oblystyq máslıhat hatshysy Qaırat Balabıev referendým máselesinen bólek, kásipkerlerge Prezıdent tarapynan kórsetiletin qoldaýyn atap ótip, kásipkerlerdiń el ekonomıkasyna qosqan úlesi, shaǵyn jáne orta kásipkerlik nysandarynyń ózekti máselelerin kóterdi.
Budan bólek jıynǵa qatysqan kásip ıeleri respýblıka boıynsha ótkiziletin referendým tóńiregindegi mańyzdy suraqtarǵa jan-jaqty jaýap alyp, bıznes tóńireginde talqylaýǵa belsene qatysty.
"Adyrna" ulttyq portaly.
