الماتى قالاسىندا Aport Mall East ساۋدا-ويىن-ساۋىق ورتالىعىندا 1 ناۋرىز – العىس ايتۋ كۇنىنە ورايلاستىرىلعان رەسپۋبليكالىق رەفەرەندۋمدى قولداۋعا ارنالعان اۋقىمدى «ALGYS FEST» كونتسەرتى ءوتتى.
ءىس-شاراعا قالا جاستارىنىڭ 5000-نان استام وكىلى، سونداي-اق «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» قالالىق كواليتسياسىنىڭ وكىلدەرى قاتىستى. كەش بارىسىندا ەل ازاماتتارىن الداعى رەفەرەندۋمعا بەلسەندى قاتىسۋعا شاقىرۋعا ەرەكشە نازار اۋدارىلدى. كونتسەرت اياسىندا كوپشىلىككە جاڭا كونستيتۋتسيا جوباسىنىڭ ماڭىزدىلىعى ءتۇسىندىرىلىپ، ءاربىر ازاماتتىڭ ءوز ۇستانىمىن ءبىلدىرۋى ەل دامۋى ءۇشىن ماڭىزدى قادام ەكەنى اتاپ ءوتىلدى.
كونتسەرتتىك باعدارلاماعا ەلىمىزدىڭ تانىمال ونەر جۇلدىزدارى – الاشۇلى، Raim, ەركە ەسماحان، Kalifarniya, الاتاۋ سەرىلەرى، ارقايىم، نۇرسۋلتان نۋربەرديەۆ، بالاۋسا ەرعالينا جانە سەرىكبول سايلاۋبەك، سونداي-اق الاتاۋ ءداستۇرلى ونەر تەاترىنىڭ ارتىستەرى قاتىستى. ونەرپازدار جينالعان قاۋىمدى كوكتەمنىڭ العاشقى مەرەكەسى – العىس ايتۋ كۇنىمەن قۇتتىقتاپ، الداعى رەفەرەندۋمعا قاتىسۋعا شاقىردى.
شارا بارىسىندا قالالىق كواليتسيا مۇشەلەرى مەن قوعام بەلسەندىلەرى ءسوز سويلەپ، ەلىمىزدە جۇزەگە اسىرىلىپ جاتقان ساياسي وزگەرىستەر جونىندە پىكىر ءبىلدىردى. ولار قاتىسۋشىلاردى 15 ناۋرىز كۇنى وتەتىن رەفەرەندۋمعا قاتىسىپ، ازاماتتىق جاۋاپكەرشىلىك تانىتۋعا جانە ءوز تاڭداۋلارىن جاساۋعا ۇندەدى.
الماتى قالاسى قوعامدىق كەڭەسىنىڭ جانە قالالىق كواليتسيانىڭ مۇشەسى دىلدابەك ديداربەك جۇماعاليۇلى ءوز سوزىندە الماتى قالاسى ءاردايىم ساياسي وزگەرىستەردىڭ بەل ورتاسىندا بولعانىن، قالا تۇرعىندارى قاشاندا جوعارى ازاماتتىق بەلسەندىلىك تانىتىپ كەلگەنىن اتاپ ءوتتى.
«الداعى ماڭىزدى وزگەرىستەر جاڭا اتا زاڭدى قابىلداۋمەن بايلانىستى. جاڭا كونستيتۋتسيا – ادىلەتتى قازاقستاندى قالىپتاستىرۋعا باعىتتالعان نەگىزگى قۇجات. بۇل كونستيتۋتسيا ەلىمىزدىڭ ءاربىر ازاماتىنا قىزمەت ەتەتىن، ولاردىڭ قۇقىقتارى مەن مۇددەلەرىن قورعاۋعا ارنالعان زاڭ بولماق. ادىلەتتى قازاقستان جولىندا بۇگىنگى جاس ۇرپاق دامىعان، قۋاتتى مەملەكەتتە ءومىر سۇرەتىنىنە سەنىم مول. الماتى قالاسى قاشاندا ساياسي جاڭعىرۋدىڭ الدىڭعى قاتارىندا كەلەدى. سوندىقتان 15 ناۋرىز كۇنى وتەتىن رەفەرەندۋمعا قاتىسىپ، جاڭا كونستيتۋتسيانى قولداۋعا شاقىرامىز»، – دەدى ول.
«قازاقستاننىڭ ۇيعىر جاستار وداعى» رەسپۋبليكالىق قوعامدىق بىرلەستىگىنىڭ توراعاسى، قالالىق كواليتسيا مۇشەسى رۋستام ابدۋسالامۇلى قايريەۆ تە مەرەكەلىك كۇننىڭ سيمۆولدىق مانىنە توقتالدى.
«بيىل العىس ايتۋ مەرەكەسىن اتاپ ءوتىپ جاتقانىمىزعا 10 جىل تولىپ وتىر. وسى ۋاقىتقا دەيىن مەن وتباسىما، تۋعان-تۋىستارىما، دوستارىما العىس ايتىپ كەلدىم. ال بۇگىن 30 جىل بويى ءبىزدىڭ قۇقىقتارىمىزدى قورعاپ كەلگەن كونستيتۋتسيامىزعا العىس بىلدىرگىم كەلەدى. دەگەنمەن ۋاقىت تالابىنا ساي جاڭا كونستيتۋتسيانى قابىلدايتىن كەزەڭ كەلدى»، – دەدى ول.
ءىس-شارا مەرەكەلىك كوڭىل كۇيمەن، پاتريوتتىق رۋحپەن جانە جاستاردىڭ بەلسەندى قاتىسۋىمەن ءوتتى. ۇيىمداستىرۋشىلاردىڭ ايتۋىنشا، مۇنداي فورماتتاعى اشىق الاڭدار قوعامدى ماڭىزدى ساياسي ۇدەرىستەر توڭىرەگىندە بىرىكتىرۋگە جانە ازاماتتىق بەلسەندىلىكتى ارتتىرۋعا ىقپال ەتەدى.
شارا سوڭىندا ۇيىمداستىرۋشىلار الماتىلىقتاردى 15 ناۋرىز كۇنى وتەتىن رەسپۋبليكالىق رەفەرەندۋمعا قاتىسىپ، ەل بولاشاعى ءۇشىن ماڭىزدى شەشىم قابىلداۋعا شاقىردى.
