ۇلتتىق مۋزەي ۇجىمى پرەزيدەنت قاسىم-جومارت توقاەۆقا ارىستانبەك مۇحامەديۇلىنىڭ ءىسى بويىنشا ءتيىستى تەكسەرۋ جۇرگىزۋدى سۇراپ، ۇجىمدىق حات جازدى، دەپ حابارلايدى “ادىرنا” ۇلتتىق پورتالى orda.kz سايتىنا سىلتەمە جاساپ.
«ءبىز، قر ۇلتتىق مۋزەيىنىڭ قىزمەتكەرلەرى، قازاقستان رەسپۋبليكاسى ۇلتتىق مۋزەيىنىڭ لاۋازىمدى تۇلعالارىنا قوعامدا، ەلدە قىزۋ تالقىلانىپ جاتقان نەگىزسىز ايىپتاۋلارعا ارالاسۋىڭىزدى سۇرايمىز»، - دەپ جازادى ولار.
حاتتا ۇجىم مۇراجايدىڭ ەلىمىزدىڭ رۋحاني ومىرىندەگى داستۇرلەر مەن جاڭالىقتاردى بىرىكتىرەتىن بىردەن-ءبىر ۇيىم ەكەنىن ايتادى. ولار ءوز مالىمدەمەسىندە «التىن ادامنىڭ» الەمگە ساياحاتىن دا اتاپ وتەدى.
«ۇلتتىق قۇندىلىقتارىمىزدى، تەرەڭ تاريحىمىزدى، قايتالانباس ونەرىمىزدى الەم حالقىنا پاش ەتەتىن «التىن ادام» الەمگە ايگىلى مۇراجايلارعا قويىلدى»، - دەپ جازدى مەكەمە قىزمەتكەرلەرى.
ولار حالىقتىڭ مادەني ءومىرىنىڭ يگىلىگى ءۇشىن ەڭبەك ەتكەندە مۇراجايدا زاڭدى دا، زاڭسىز دا تىنتۋلەردىڭ ورىن الاتىنىنا نارازى.
«تەرگەۋشىلەردىڭ باستى ماقساتى – مەكەمەنىڭ قارجى-ەكونوميكالىق ساياساتىنداعى كەيبىر ولقىلىقتاردى تاۋىپ، جوعارى لاۋازىمدى تۇلعالاردىڭ كىناسىن اشكەرەلەۋ»، - دەيدى ولار.
مۇراجاي قىزمەتكەرلەرى ءىستىڭ شىنايى ءارى وبەكتيۆتى بولۋى ءۇشىن پرەزيدەنتتەن ءىستى باقىلاۋعا الۋىن سۇرايدى.
ايتا كەتەيىك، ۇلتتىق مۋزەي باسشىلىعى بيۋدجەت قارجىسىن جىمقىردى دەگەن كۇدىككە ءىلىندى. سىبايلاس جەمقورلىققا قارسى قىزمەتتىڭ ەلوردالىق دەپارتامەنتى «التىن ادامنىڭ شەرۋى» حالىقارالىق كورمەسىن وتكىزۋگە مەملەكەتتىك ساتىپ الۋ تۋرالى شارت اياسىندا 146 ميلليون تەڭگە بيۋدجەت قاراجاتىن جىمقىرۋ دەرەگى بويىنشا سوتقا دەيىنگى تەرگەۋ جۇرگىزىپ جاتىر.
16 مامىردا ۇلتتىق مۋزەيدە جانە نۇر-سۇلتانداعى ارىستانبەك مۇحامەديۇلىنىڭ ۇيىندە ءتىنتۋ جۇرگىزىلگەنى بەلگىلى بولدى.
”ادىرنا” ۇلتتىق پورتالى
