ەكس-مادەنيەت ءمينيسترى ارىستانبەك مۇحامەديۇلىنا تيەسىلى سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى مەملەكەتكە قايتارىلدى، دەپ حابارلايدى “ادىرنا” ۇلتتىق پورتالى.
Tengrinews.kz اگەنتتىگىنىڭ اقپاراتىنا سايكەس، الماتى قالاسى جەتىسۋ اۋدانى پروكۋراتۋراسىنىڭ تالاپ-ارىزى بويىنشا قۇنى 1,2 ميلليارد تەڭگە بولاتىن مەملەكەتتىك مۇلىك قايتارىلدى.
17 شىلدە كۇنى الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبىن ساتۋ جونىندەگى مامىلەنى جارامسىز دەپ تانۋ تۋرالى شەشىمى زاڭدى كۇشىنە ەندى.
Cونىمەن قاتار، سوتتا نىساننىڭ نارىقتىق قۇنىن 551 ملن تەڭگەگە تومەندەتۋ كورىنىس تاپقان زاڭ بۇزۋشىلىقتار راستالدى.
اكىمشىلىك عيماراتتاردىڭ، سپورت زالدارىنىڭ جانە باسقا دا قۇرىلىستاردىڭ 7,6 مىڭ م2, سونداي-اق 4,9 گا جەردى قۇرايتىن مەكتەپتىڭ مۇلكىنە، ارىستانبەك مۇحامەديۇلىمەن اففيليرلەنگەن تۇلعالارعا تيەسىلى "Nomad's Land" جشس يەلىك ەتكەن.
ەسكە سالا كەتسەك، ارىستانبەك مۇحامەديۇلى بۇعان دەيىن ەكى ءىس بويىنشا ايىپتى دەپ تانىلدى. الدىمەن ۇلتتىق مۋزەيدەگى جەمقورلىق دەرەگى بويىنشا 8 جىل ارقالادى، كەيىن سول جازانى جەڭىلدەتۋ ءۇشىن ادۆوكاتى ارقىلى پارا بەرىپ، تاعى ايىپتى دەپ تانىلدى. العاشىنداعى سەگىز جىل جازاسىنا تاعى ءۇش جىل قوسىلىپ، 11 جىلعا سوتتالدى. سوت ءۇشىنشى ءىس بويىنشا دا كىنالى دەپ تاپقاننىڭ وزىندە، تاعى 12 جىل جازا قوسىلمايدى. زاڭ بويىنشا، ايىپتالۋشى كەسىلگەن ءۇش جازانىڭ ىشىندەگى ەڭ اۋىرىن وتەۋگە ءتيىس.
