7 شىلدە كۇنى اقش پرەزيدەنتى دونالد ترامپ الەۋمەتتىك جەلىدەگى Truth Social پاراقشاسىندا قازاقستان پرەزيدەنتى قاسىم-جومارت توقاەۆقا جولداعان حاتىنىڭ سۋرەتىن جاريالادى، دەپ حابارلايدى “ادىرنا”.
«سىزگە بۇل حاتتى جولداۋ مەن ءۇشىن ۇلكەن قۇرمەت. ويتكەنى بۇل ساۋدا قاتىناستارىمىزدىڭ بەرىكتىگىن جانە اقش-تىڭ قازاقستانمەن ىنتىماقتاستىقتى جالعاستىرۋعا دايىن ەكەنىن كورسەتەدى، ءتىپتى ەكى ەل اراسىنداعى ايتارلىقتاي ساۋدا تاپشىلىعىنا قاراماستان»، دەلىنگەن اقش پرەزيدەنتى قول قويعان، قازاقستان پرەزيدەنتىنىڭ اتىنا جولدانعان حاتتا.
ترامپتىڭ پىكىرىنشە، قازاقستاننىڭ تاريفتەرى، تاريفتىك ەمەس شارالارى، ساياساتى جانە ساۋدا كەدەرگىلەرى تۋدىرعان ۇزاقمەرزىمدى ءارى تۇراقتى ساۋدا تەڭگەرىمسىزدىگىن جويۋ قاجەت.
«2025 جىلدىڭ 1 تامىزىنان باستاپ ءبىز اقش-قا يمپورتتالاتىن بارلىق قازاقستاندىق تاۋارلارعا 25 پايىز مولشەرىندە باج سالىعىن ەنگىزەمىز. بۇل تاريف سالالىق تاريفتەردەن بولەك ەسەپتەلەدى. 25% — بۇل ءبىزدىڭ ەلدەر اراسىنداعى ساۋدا تەڭگەرىمسىزدىگىن جويۋ ءۇشىن قاجەت مولشەردەن الدەقايدا از ەكەنىن ەسكەرۋىڭىزدى سۇرايمىن»، - دەپ جازادى ترامپ.
سونىمەن قاتار، حاتتا «ەگەر قازاقستان نەمەسە قازاقستاندىق كومپانيالار اقش اۋماعىندا تاۋار وندىرەتىن بولسا، ەشقانداي تاريفتەر سالىنبايدى» دەپ ناقتى كورسەتىلگەن. ال ەگەر قازاقستان ءوز تاراپىنان كەدەندىك الىمداردى كوتەرەتىن بولسا، ول 25%-عا قوسىمشا رەتىندە ەسەپتەلەتىنى ەسكەرتىلگەن.
ترامپتىڭ پىكىرىنشە، «بۇل تاريفتەر قازاقستان تاراپىنان كەلگەن كوپجىلدىق بۇرمالانۋلاردى تۇزەتۋ ءۇشىن قاجەت» جانە ول توقاەۆتى وسىنى تۇسىنۋگە شاقىرادى.
بۇعان دەيىن اقش پرەزيدەنتى وسىنداي مازمۇنداعى حاتتى مالايزيا سۇلتانىنىڭ اتىنا جاريالاعان بولاتىن – بۇل ەلگە دە 25% تاريف بەلگىلەندى. قازاقستاننان كەيىن كەزەك ۆەتنامعا (تاريف – 40%), ميانماعا (40%) جانە وڭتۇستىك افريكا رەسپۋبليكاسىنا (30%) كەلدى.
ايتا كەتەيىك، اقش 2025 جىلدىڭ 3 ساۋىرىندە الەمنىڭ 185 ەلىنە قاتىستى كەدەندىك باج سالىعىن ەنگىزگەن بولاتىن. دونالد ترامپ بۇل شارالاردى «جاۋاپتى جانە ساۋداداعى ادىلەتتىلىكتى قالپىنا كەلتىرۋ» دەپ اتاعان. سول كەزدە قازاقستان ونىمدەرىنە 27% تاريف بەلگىلەنگەن ەدى.
