بعم بالالاردىڭ قۇقىقتارىن قورعاۋ كوميتەتى بالالار جىلى اياسىندا «Bala Qorgau» ينتەرنەت-رەسۋرسىن ىسكە قوستى. ەندى مەكتەپتەردە QR-كودى جانە «Bala Qorgau» سايتىنىڭ مەكەنجايى جازىلعان ارنايى تاقتايشالار ورناتىلادى، دەپ حابارلايدى «ادىرنا» ۇلتتىق پورتالى.
QR-كودتى سكانەرلەۋ ارقىلى وقۋشىلار «Bala Qorgau» سايتىنا ءوتىپ، ءوز سۇراقتارىن قويا الادى. وقۋشىلار مەن اتا-انالار دا جاسىرىن تۇردە كومەك سۇراپ، ءبىلىم بەرۋ ۇيىمدارىنداعى زاڭسىز ارەكەتتەر تۋرالى حابارلاي الادى. ءوتىنىش بەرۋشىلەردىڭ انونيم بولىپ قالاتىنىنا كەپىلدىك بەرىلەدى.
«بۇگىنگى كۇنگە دەيىن نۇر-سۇلتان مەن الماتىنىڭ بىرنەشە مەكتەبىندە QR-تاقتايشالار ورناتىلدى. الداعى ۋاقىتتا ولار باسقا دا ءبىلىم بەرۋ ۇيىمدارىندا قويىلادى. قازىردىڭ وزىندە 100-دەن استام ءوتىنىش ءتۇستى، ولار نەگىزىنەن بالالار مەن اتا-انالار اراسىنداعى قارىم-قاتىناس ماسەلەلەرىنە قاتىستى»، – دەلىنگەن حابارلامادا.
«Bala Qorgau» سايتى وقۋشىلار ءاردايىم قاجەتتى قولداۋ مەن كومەك سۇراپ، وزدەرىن قاۋىپسىز سەزىنۋلەرى ءۇشىن جاسالعان.
«ەندى وقۋشىلار QR-كودتى سكانەرلەپ، بىزبەن بايلانىسا الادى، ءسويتىپ ولارعا قاجەتتى كونسۋلتاتسيا، پسيحولوگيالىق كومەك كورسەتىلەدى. ۆەب-سايت وقۋشىلاردى تولعاندىراتىن وزەكتى ماسەلەلەردى، سونداي-اق بالالار قۇقىقتارىن بۇزۋ فاكتىلەرىن تەز ارادا انىقتاۋعا كومەكتەسەدى. بۇل رەسۋرس وقۋشىلاردىڭ جانە ولاردىڭ اتا-انالارىنىڭ قۇقىقتىق ساۋاتتىلىعىن ارتتىرۋعا سەپتىگىن تيگىزەدى»، – دەدى بعم بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى ەلينا پاۋلي.
«ادىرنا» ۇلتتىق پورتالى
