BǴM Balalardyń quqyqtaryn qorǵaý komıteti Balalar jyly aıasynda «Bala Qorgau» ınternet-resýrsyn iske qosty. Endi mektepterde QR-kody jáne «Bala Qorgau» saıtynyń mekenjaıy jazylǵan arnaıy taqtaıshalar ornatylady, dep habarlaıdy «Adyrna» ulttyq portaly.
QR-kodty skanerleý arqyly oqýshylar «Bala Qorgau» saıtyna ótip, óz suraqtaryn qoıa alady. Oqýshylar men ata-analar da jasyryn túrde kómek surap, bilim berý uıymdaryndaǵy zańsyz áreketter týraly habarlaı alady. Ótinish berýshilerdiń anonım bolyp qalatynyna kepildik beriledi.
«Búgingi kúnge deıin Nur-Sultan men Almatynyń birneshe mektebinde QR-taqtaıshalar ornatyldy. Aldaǵy ýaqytta olar basqa da bilim berý uıymdarynda qoıylady. Qazirdiń ózinde 100-den astam ótinish tústi, olar negizinen balalar men ata-analar arasyndaǵy qarym-qatynas máselelerine qatysty», – delingen habarlamada.
«Bala Qorgau» saıty oqýshylar árdaıym qajetti qoldaý men kómek surap, ózderin qaýipsiz sezinýleri úshin jasalǵan.
«Endi oqýshylar QR-kodty skanerlep, bizben baılanysa alady, sóıtip olarǵa qajetti konsýltaııa, psıhologııalyq kómek kórsetiledi. Veb-saıt oqýshylardy tolǵandyratyn ózekti máselelerdi, sondaı-aq balalar quqyqtaryn buzý faktilerin tez arada anyqtaýǵa kómektesedi. Bul resýrs oqýshylardyń jáne olardyń ata-analarynyń quqyqtyq saýattylyǵyn arttyrýǵa septigin tıgizedi», – dedi BǴM Balalardyń quqyqtaryn qorǵaý komıteti tóraǵasynyń orynbasary Elına Paýlı.
«Adyrna» ulttyq portaly
