بەلگىلى جازۋشى، دراماتۋرگ سافۋان شايمەردەنوۆ تۋىپ-وسكەن امانگەلدى اۋىلى قاڭىراپ بوس قالعان. قازىر جازۋشىنىڭ ۇلى سايىن شايمەردەن اكەسىنىڭ ارۋاعىن ريزا قىلۋ ءۇشىن اۋىلدى باياعى دەڭگەيىنە جەتكىزۋگە تىرىسىپ ءجۇر، دەپ حابارلايدى "ادىرنا" ۇلتتىق پورتالى.
بۇل تۋرالى قوعام بەلسەندىسى بۋراحان داقانوۆ ءوزىنىڭ فەيسبۋك پاراقشاسىندا جازدى.
"ۇلى دراماتۋرگ، سافۋان اعامىز سولتۇستىك قازاقستان وبلىسى، جامبىل اۋدانى، امانگەلدى اۋىلىندا دۇنيەگە كەلگەن. مىنە، سول قاسيەتتى اۋىل، بۇگىن قاڭىراپ بوس تۇر، مال باققان مالشىدان باسقا ادام جوق. تاس لاقتىرساڭ كولگە، قالىڭ ورمانعا تيەتىن بۇل جەر(اۋىلدىڭ ماڭىندا 8 كول سانادىم) قارا توپىراعى قالىڭ، مال باققانعا وتە موتە ىڭعايلى. جامبىل اۋدانىنىڭ شەت جاعىندا، شال اقىنمەن شەكارالاس جەردە ورنالاسقان بۇل اۋىل، بلاگوۆەششەنكى ەلدى مەكەنىنەن جەتى كيلومەتر جەردە. باعالارى 200 مىڭنان اسپايتىن 15 شاقتى ءۇي تۇرۋعا جارامدى كۇيىندە تۇر. تەك رەمونت كەرەك. بىراق مەكتەپ جوق. دەگەنمەن ادامدار جينالا باستاسا، ۇكىمەت مەكتەپتى اشىپ بەرەرى ايدان انىق... ويتكەنى عيماراتى تۇر", — دەپ جازدى ول پاراقشاسىندا.
قوعام بەلسەندىسىنىڭ ايتۋىنشا، اۋىل يەلىگىندە، ياعني، اۋىلدىڭ بۇرىنعى تۇرعىندارى قولىندا 4 مىڭ گەكتاردان استام ەگىستىك جەر بار. قازىر ولار جەردى فيرمالارعا ارەنداعا بەرىپ، پاي الىپ وتىرعان كورىنەدى. بۇرىنعى تۇرعىندار ەلدى مەكەنگە كەلىپ، اۋىلدى كوتەرەم دەگەن ءىرى كاسىپكەرلەرگە جەرلەرىن بەرۋگە دايىن.
"ماعان قاتتى اسەر ەتكەنى بۇزىلعان ءۇيدىڭ توبەسىندەگى قۇستىڭ ۇياسىندا قونىستانعان ەكى قارا تورعاي بولدى. سايىن اعانىڭ ايتۋى بويىنشا، بۇل ءۇيدىڭ بۇزىلعانىنا 6-7 جىل بولسا دا وسى ۇياعا كەپ قونىستانىپ، جۇمىرتقا باسادى ەكەن. ويلاپ قاراڭىزشى، قۇمالاقتاي جۇرەگى، قۇمالاقتاي ميى بار تورعايدىڭ ءوزى ەلدىڭ، جەردىڭ قادىرىن بىلەدى. ءبىلىپ قانا قويماي، جىل قۇسى بوپ قاڭعىرىپ، جۇزدەگەن، مىڭداعان كم جەردەن وسى ۇياعا كەلىپ قونىستانىپ تۇر.. ال ءبىز شە، ءبىزدىڭ قاي جەرىمىز كەم؟", — دەپ جازدى بۋراحان داقانوۆ.
"ادىرنا" ۇلتتىق پورتالى.
