Belgili jazýshy, dramatýrg Safýan Shaımerdenov týyp-ósken Amangeldi aýyly qańyrap bos qalǵan. Qazir jazýshynyń uly Saıyn Shaımerden ákesiniń arýaǵyn rıza qylý úshin aýyldy baıaǵy deńgeıine jetkizýge tyrysyp júr, dep habarlaıdy "Adyrna" ulttyq portaly.
Bul týraly qoǵam belsendisi Býrahan Daqanov óziniń feısbýk paraqshasynda jazdy.
"Uly dramatýrg, Safýan aǵamyz Soltústik Qazaqstan oblysy, Jambyl aýdany, Amangeldi aýylynda dúnıege kelgen. Mine, sol qasıetti aýyl, búgin qańyrap bos tur, mal baqqan malshydan basqa adam joq. Tas laqtyrsań kólge, qalyń ormanǵa tıetin bul jer(aýyldyń mańynda 8 kól sanadym) qara topyraǵy qalyń, mal baqqanǵa óte móte yńǵaıly. Jambyl aýdanynyń shet jaǵynda, Shal aqynmen shekaralas jerde ornalasqan bul aýyl, Blagoveenki eldi mekeninen jeti kılometr jerde. Baǵalary 200 myńnan aspaıtyn 15 shaqty úı turýǵa jaramdy kúıinde tur. Tek remont kerek. Biraq mektep joq. Degenmen adamdar jınala bastasa, Úkimet mektepti ashyp bereri aıdan anyq... Óıtkeni ǵımaraty tur", — dep jazdy ol paraqshasynda.
Qoǵam belsendisiniń aıtýynsha, aýyl ıeliginde, ıaǵnı, aýyldyń burynǵy turǵyndary qolynda 4 myń gektardan astam egistik jer bar. Qazir olar jerdi fırmalarǵa arendaǵa berip, paı alyp otyrǵan kórinedi. Burynǵy turǵyndar eldi mekenge kelip, aýyldy kóterem degen iri kásipkerlerge jerlerin berýge daıyn.
"Maǵan qatty áser etkeni buzylǵan úıdiń tóbesindegi qustyń uıasynda qonystanǵan eki qara torǵaı boldy. Saıyn aǵanyń aıtýy boıynsha, bul úıdiń buzylǵanyna 6-7 jyl bolsa da osy uıaǵa kep qonystanyp, jumyrtqa basady eken. Oılap qarańyzshy, qumalaqtaı júregi, qumalaqtaı mıy bar torǵaıdyń ózi eldiń, jerdiń qadirin biledi. Bilip qana qoımaı, jyl qusy bop qańǵyryp, júzdegen, myńdaǵan km jerden osy uıaǵa kelip qonystanyp tur.. Al biz she, bizdiń qaı jerimiz kem?", — dep jazdy Býrahan Daqanov.
"Adyrna" ulttyq portaly.
