ەكى ايەل قازىعۇرت تۇرعىنىن گيپنوز جاساپ، توناپ كەتتى

قازىعۇرت اۋداندىق پوليتسيا ءبولىمىنىڭ 102 پۋلتىنە 12 مامىر كۇنى كۇندىزگى ۋاقىتتا جەرگىلىكتى تۇرعىن شاعىمدانىپ، ەكى ايەلگە الدانعانىن، ولار گيپنوز ارقىلى كوز الدىندا التىندارىن جىمقىرىپ كەتكەنىن ايتىپ شاعىمداندى.

ەگدە جاستاعى ايەلدىڭ ايتۋىنشا، ونىڭ ۇيىنە وزگە ۇلتتاعى ەكى ايەل كەلگەن. "ولار جابىرلەنۋشىگە ۇيىڭدە دۋا بار، سونى تازالاپ بەرەمىز دەگەن جەلەۋمەن وزدەرىنىڭ تازالاۋ ارەكەتتەرىن جاساپ، وسى ارالىقتا تۇرعىننىڭ التىن القاسىن، ساۋساعىنداعى التىن ساقيناسى مەن 100 مىڭ تەڭگەدەن استام اقشاسىن الداۋ جولىمەن اكەتىپ قالعان. ولار كەتكەن بويدا ەسىن جيناعان ايەل بىردەن پوليتسياعا حابارلاسىپ، الاياقتاردى ۇستاۋعا كومەكتەسۋىن سۇرادى", — دەلىنگەن قر ءىىم ءباسپاسوز قىزمەتى حابارلاماسىندا.تاجىريبەلى پوليتسەيلەر جابىرلەنۋشىنىڭ ايتقان بەلگىلەرى بويىنشا جەدەل ىسكە كىرىسىپ، بارلىق قاجەتتى شارالاردى جاسادى. ولاردىڭ ءمىنىپ كەلگەن كولىگى تۋرالى ۇلكەن تراسسا بويىنداعى پاترۋلدىك پوليتسيا قىزمەتكەرلەرىنە حابارلادى. وسىلايشا جولداردى پاترۋلدەپ جۇرگەن تۇركىستان وبلىسىنىڭ پاترۋلدىك پوليتسيا باتالونىنىڭ التىنشى ۆزۆود قىزمەتكەرلەرى اتالعان كۇدىكتىلەر مىنگەن Lada Priora كولىگىنىڭ ىزىنە ءتۇستى. "جارتى ساعاتتاي ءجۇرىپ، كولىكتى تاۋىپ، سوڭىنان قۋىپ جەتىپ، توقتاتتى. ال كولىك ىشىندەگى ايەلدەر پوليتسەيلەردى كورگەن بەتتە قاشا جونەلگەن. پوليتسەيلەر بىردەن ارقايسىسى ءار جاققا قاشقان ايەلدەردى تۇگەلىمەن ۇستادى. اتالعان كۇدىكتى ەكى ايەلدەن الاياقتىق جولمەن الىنعان التىندار مەن اقشا ايعاقتى زات رەتىندە الىندى. پاترۋلدىك پوليتسەيلەر كولىكتە بولعان بەس ايەلدى پوليتسياعا جەتكىزدى. ولاردىڭ جەكە باسىن تەكسەرۋ كەزىندە وزبەكستان رەسپۋبليكاسىنىڭ تۇرعىندارى ەكەندىگى انىقتالدى", — دەدى قر ءىىم ءباسپاسوز قىزمەتى.اتالعان جايت قازىعۇرت اپب-عا قر قك-ءنىڭ 190-بابى (الاياقتىق) بويىنشا تىركەۋگە الىنىپ، سوتقا دەيىنگى تەرگەپ-تەكسەرۋ امالدارى جۇرگىزىلۋدە. قازىرگى تاڭدا پوليتسەيلەر ولاردىڭ تۇركىستان وبلىسىندا ورىن العان باسقا دا الاياقتىق ىستەرىنە قاتىستىلىعىن تەكسەرۋدە.