زاڭگەر: راقىمشىلىق - مەملەكەتتىڭ ازاماتتارعا جاناشىرلىعىنىڭ كورىنىسى

2380
Adyrna.kz Telegram

مۇنداي پىكىردى زاڭناما جانە قۇقىقتىق اقپارات ينستيتۋتىنىڭ باس عىلىمي كەڭەسشىسى، ل.ن.گۋميلەۆ اتىنداعى ەۇۋ پروفەسسورى ەرمەك ءابدىراسۇلوۆ ايتتى، دەپ حابارلايدى "ادىرنا" ۇلتتىق پورتالى. 

- بۇل شەشىمدى دۇرىس دەپ ەسەپتەيمىن. مۇنداي شارانىڭ كەرەك ەكەنىن پرەزيدەنت قاسىم-جومارت توقاەۆ سوڭعى جولداۋىندا ايتقان ەدى. سونىڭ ناتيجەسىندە بۇگىنگى تاڭدا پارلامەنت قاجەتتى زاڭ جوباسىن قابىلدادى. راقىمشىلىق تۋرالى زاڭ جوباسىن ازىرلەۋگە بەلگىلى زاڭگەرلەر مەن ساراپشىلار اتسالىستى. ەڭ الدىمەن مۇنى گۋمانيزم اكتىسى دەسەك بولادى. كوپتەگەن مەملەكەتتە وسىنداي راقىمشىلىق جاساۋ زاڭ اياسىندا ءجيى قولدانىلادى، - دەدى ەرمەك ءابدىراسۇلوۆ.

سونىمەن قاتار، ساراپشى زاڭنىڭ ناقتى كىمدەرگە قولدانىلاتىنىن ءتۇسىندىردى.

- قاڭتار وقيعاسى كەزىندە، ناقتىراق ايتساق، 4-7 قاڭتار ارالىعىندا قىلمىستىق تەرىس قىلىقتار جاساعان ازاماتتار، سونىمەن بىرگە اۋىرلىعى از جانە ورتاشا قىلمىستار زاڭدى سوتتىلىقتان الىپ تاستاي وتىرىپ، جازادان تولىق بوساتۋدى كوزدەيدى. راقىمشىلىق بيلىكتى اسىرا پايدالانعان، وقيعانى ۇيىمداستىرعان، تەرروريستەرگە جانە ەكستەرميستەرگە، ادامدى ازاپتاعاندارعا جاسالمايدى، - دەدى پروفەسسور ءابدىراسۇلوۆ.

ساراپشىنىڭ ايتۋىنشا، بۇل ىسكە قاتىسى بار 1600 جۋىق ادام انىقتالعان، قازىرگى تاڭدا 1500 ازامات راقىمشىلىققا ىلىنگەن.

- راقىمشىلىق ينستيتۋتى دەگەنىمىز – قۇقىقتىق مەملەكەتتە گۋمانيزم ءپرينتسيپىن جۇزەگە اسىراتىن ۇيىم. بۇل ينستيتۋت مەملەكەتتىڭ ازاماتتارىمىزعا جانارشىرلىعىنىڭ كورىنىسى دەپ سانايمىن. بۇل ادىلەتتى قازاقستاندى قۇرۋ جولىندا وزەكتى شارالاردىڭ ءبىرى دەپ سانايمىن، - دەدى زاڭگەر.

ەسكە سالا كەتەيىك، پارلامەنت قاڭتار وقيعاسىنا قاتىسۋشىلارعا راقىمشىلىق جاساۋ تۋرالى زاڭدى قابىلداعان ەدى.

سەناتتىڭ جاۋاپتى كوميتەتىنىڭ قورىتىندىسىندا كورسەتىلگەندەي، زاڭ جوباسىنا دەپۋتاتتار باستاماشىلىق جاسادى جانە ول مەملەكەت باسشىسىنىڭ 2022 جىلعى 1 قىركۇيەكتەگى قازاقستان حالقىنا جولداۋى شەڭبەرىندەگى تاپسىرمالاردى ورىنداۋ ءۇشىن ازىرلەندى.

"ادىرنا" ۇلتتىق پورتالى

پىكىرلەر