بۇگىن سەنات وتىرىسىندا «راقىمشىلىق جاساۋ تۋرالى» زاڭ ماقۇلداندى. بۇعان قاتىستى زاڭ عىلىمدارىنىڭ دوكتورى، پروفەسسور ەسبەرگەن ورازۇلى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
"قاڭتار وقيعاسىنا قاتىسقان ازاماتتارعا راقىمشىلىق بەرۋ تۋرالى زاڭ – گۋمانيزمنىڭ ءبىر بەلگىسى. قازىر ورتا ەسەپپەن 1,5 مىڭنان اسا ادام وسى كەشىرىم زاڭىنا ىلىنەدى دەۋدە. ول اسا اۋىر، اۋىر جانە جەڭىل قىلمىستارعا قاتىستى. جەڭىل قىلمىس ساناتىندا جۇرگەندەر جونىندە ءىستى ءتىپتى توقتامعا الادى. بۇل پرەزيدەنتتىڭ قازاقستان حالقىنا جاساپ جاتقان كەشىرىمىنىڭ ءبىرى. ارينە بۇل شەشىممەن تولىقتاي كەلىسەمىز. بۇل الەمدىك پراكتيكادا بار دۇنيە", – دەدى عالىم.
سونداي-اق قاڭتار وقيعاسىندا كوپشىلىكتىڭ اراڭداتۋشىلاردىڭ، ارنايى قوزعاۋشى كۇشتەردىڭ قۇربانى بولعانىن ايتتى.
"قاڭتار وقيعاسىندا كوپ ادامداردىڭ تىكەلەي قىلمىس جاساۋ نيەتىمەن الاڭعا شىققانى تۋرالى ايتۋ قيىن. سەبەبى، ءتۇرلى قوزعاۋشى كۇشتەر بولدى. سوندىقتان بۇل ماسەلە وبەكتيۆتى، سۋبەكتيۆتى جاعىنان تولىق ەسكەرىلىپ، بۇگىن وسىنداي شەشىم قابىلداندى. پرەزيدەنت بۇل زاڭعا قول قويعان كۇننەن باستاپ، ءاربىر وڭىردەگى وسى ساناتتاعى ازاماتتار راقىمشىلىققا يە بولادى", – دەيدى ەسبەرگەن ورازۇلى.
ەستەرىڭىزگە سالا كەتەيىك، وسىعان دەيىن سەنات وتىرىسىندا بۇل زاڭ جوباسى پرەزيدەنت قاسىم-جومارت توقاەۆتىڭ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىنداعى ىزگىلىك يدەياسىنىڭ نەگىزىندە يگى نيەتتىلىك تانىتىپ، قاڭتار وقيعالارىنا قاتىسۋشىلارعا ءبىر رەتتىك راقىمشىلىق جاساۋ تۋرالى تاپسىرماسىن ىسكە اسىرۋ ماقساتىندا ازىرلەنگەنىن ايتقان.
"ادىرنا" ۇلتتىق پورتالى
