كەشە الماتى وبلىسىنا جۇمىس ساپارىمەن دەنساۋلىق ساقتاۋ ءمينيسترى الەكسەي تسوي كەلدى. مەديتسينالىق مەكەمەلەردىڭ جۇمىس جايىمەن تانىسقان مينيستر وبلىستا اتقارىلىپ جاتقان كوروناۆيرۋسپەن كۇرەس شارالارىنا، سونىڭ ىشىندە ۆاكتسينا سالۋ كومپانياسى مەن دەنساۋلىق ساقتاۋ مەكەمەلەرىنىڭ دايىندىعىنا وڭ باعا بەردى.
مينيستر ساپارىن الدىمەن تالعار اۋدانىنداعى تالدىبۇلاق دارىگەرلىك امبۋلاتورياسىنان باستادى. وبلىس اكىمىنىڭ ورىنباسارى باتىرجان بايجۇمانوۆ اۋىلداردا امبۋلاتوريالىق كومەكتىڭ قولجەتىمدىلىگىن قامتاماسىز ەتۋ ءۇشىن بيىلعى جىلى وڭىردە 25 دەنساۋلىق ساقتاۋ نىسانى ىسكە قوسىلاتىنىن ايتتى. سونىڭ 20-سى بلوكتى-ءمودۋلدى مەديتسينالىق پۋنكت بولماق. قازىرگى كەزدە وبلىستا كوروناۆيرۋسپەن كۇرەسكە 30 مەديتسينالىق ۇيىم تارتىلعان، 4500-دەي توسەك ورىن دايىندالدى، مەديتسينالىق قۇرالدارمەن جابدىقتالۋ 89%-كە جەتكىزىلدى. 1,1 ملن. ادام ۆاكتسيناتسيا سالدىرا الادى، بۇگىنگى كۇنگە سونىڭ 60 مىڭى سالدىرعان. بۇل رەتتە ءوڭىر جاپپاي ۆاكتسينا الۋعا دايىن. 239 ەگۋ پۋنكتى، 134 كوشپەلى بريگادا دايىندالدى. ءار پۋنكتتىڭ قابىلداۋ مۇمكىندىگى 7 مىڭ ادامنان اسادى، ال قاجەت بولعان جاعدايدا پۋنكتتەردىڭ سانى 1016-عا جەتكىزىلەدى.
الەكسەي تسوي جىلجىمالى مەديتسينالىق كەشەننىڭ مۇمكىندىكتەرىنە كۋا بولدى. بۇگىنگى كۇنى وبلىستا مۇنداي 17 كەشەن بار. ولاردا جالپى تاجىريبەدەگى دارىگەردىڭ، اكۋشەر-گينەكولوگتىڭ قابىلداۋ كابينەتتەرى، ساۋلەمەن ەمدەۋ بولمەسى، اناليز وتكىزۋ ورنى، ءدارىحانا پۋنكتى بار. ۋزي، رەنتگەن تۇسىرۋگە دە مۇمكىندىك جاسالعان. ەندى وسى جىلجىمالى كەشەن بازاسىندا ەگۋ پۋنكتتەرى جۇمىس ىستەيتىن بولادى.
اقبۇلاق اۋىلىنا كەلگەن الەكسەي تسوي وسىنداي جىلجىمالى كەشەن بازاسىندا مەديتسينالىق كومەك كورسەتىلگەنىنە كۋا بولىپ، ۆاكتسينا سالدىرۋعا كەلگەن ازاماتتارمەن تىلدەستى.
دەنساۋلىق ساقتاۋ ءمينيسترىنىڭ ساپارى بۇدان ءارى ەڭبەكشىقازاق اۋدانىندا جالعاستى. مۇندا ا. تسوي ساياجاي قاۋىمداستىعى تۇرعىندارىنا ارنالعان قوسىمشا ەگۋ پۋنكتىنىڭ جانە ەڭبەكشىقازاق اۋدانىنداعى اۋدانارالىق كوپ سالالى اۋرۋحانا بازاسىندا قۇرىلعان وزىق تاجىريبەلەر ورتالىعىنىڭ جۇمىسىمەن تانىستى. وسىندا ول اۋدان، قالا اكىمدەرىمەن، ءوڭىردىڭ مەديتسينالىق مەكەمەلەرى باسشىلارىمەن وتكەن ونلاين جيىنعا قاتىستى.
