قازاقستان مەن تۇركيا اراسىنداعى جولاۋشىلار اۋە تاسىمالى ەكى ەسەگە ارتادى. وسى ايدا ەكى ەلدىڭ اۆياتسيالىق بيلىگى اۋە تاسىمالىن ودان ارمەن ارتتىرۋ مەن ۇشۋ گەوگرافياسىن كەڭەيتۋ بويىنشا كەلىسسوزدەر جۇرگىزەدى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
يدم باسشىسى قايىربەك وسكەنباەۆتىڭ سوزىنشە، قازاقستان مەن تۇركيا اراسىنداعى اۆياتسيا سالاسىنداعى ىنتىماقتاستىق ارتىپ كەلەدى. بۇگىندە اۋە قاتىناستارى بويىنشا ۇكىمەتارالىق كەلىسىم نەگىزىندە ەلدەر اراسىنداعى تۇراقتى رەيستەردىڭ جيىلىگى بويىنشا اپتاسىنا 61 جولاۋشىلار رەيسى ورىندالۋدا. اتاپ ايتقاندا، وسى مەرزىم ارالىعىندا وتاندىق Air Astana, Fly Arystan جانە SCAT اۋە كومپانيالارى 37 رەيس ورىنداسا، تۇركيالىق Turkish Airlines جانە Pegasus كومپانيالارى 24 رەيستى جۇزەگە اسىرۋدا. جولاۋشىلار ستامبۇل مەن انكاراعا جانە كەرى قاراي نۇر-سۇلتان، الماتى، اقتاۋ، اقتوبە، اتىراۋ، شىمكەنت جانە تۇركىستان قالالارى ارقىلى ۇشا الادى.
ەندى 13 مامىردان باستاپ ۇشۋ سانى اپتاسىنا 63 رەيسكە ارتپاق. سايكەسىنشە، ەلدەر اراسىنداعى اپتا سايىنعى رەيس سانى 124-كە دەيىن وسەتىن بولادى.
«بيىلعى جىلدىڭ 13 مامىرىنان باستاپ انتاليا جانە بودرۋم باعىتتارىندا قاتىنايتىن Air Astana, SCAT, Turkish Airlines اۋە كومپانيالارىنىڭ رەيس سانى بىرتىندەپ ارتاتىن بولادى. قوسىمشا رەيستەر نۇر-سۇلتان، الماتى، اقتاۋ، اقتوبە، اتىراۋ، قاراعاندى، قوستاناي، ورال، شىمكەنت جانە وسكەمەن ارقىلى ىسكە اسىرىلادى»، – دەدى قايىربەك وسكەنباەۆ.
ماسەلەن، SCAT انتالياعا اپتاسىنا 29 جاڭا رەيستى نۇر-سۇلتان (اپتاسىنا 7 رەيس), الماتى (6), اقتوبە (3), اتىراۋ (3), شىمكەنت (2), قاراعاندى (2), ورال (2), قوستاناي (2), اقتاۋ (1), وسكەمەن (1) قالالارىنان جۇزەگە اسىرادى. ال Air Astana نۇر-سۇلتان جانە الماتىدان انتاليا (7 رەيستەن) مەن بودرۋمعا (2 رەيستەن) اپتاسىنا 18 رەيس جاساماق.
Turkish Airlines انتالياعا اپتاسىنا 16 رەيستى نۇر-سۇلتان (5 رەيستەن), الماتى (4) جانە قاراعاندىدان (3) جانە بودرۋمعا نۇر-سۇلتان (2 رەيستەن) مەن الماتىدان (2) ورىندايدى.
قايىربەك وسكەنباەۆتىڭ ايتۋىنشا، بيىلعى جىلدىڭ مامىر ايىندا يندۋستريا جانە ينفراقۇرىلىمدىق دامۋ مينيسترلىگى مەملەكەتتەر اراسىنداعى اۋە تاسىمالىن ودان ارمەن ارتتىرۋ مەن ۇشۋ گەوگرافياسىن كەڭەيتۋ بويىنشا ەكى ەلدىڭ اۋە بيلىگى وكىلدەرىمەن كەلىسسوز جۇرگىزۋ ۇسىنعان. ءوز كەزەگىندە باستاما قولداۋ تاۋىپ، كەلىسسوزدەر اعىمداعى جىلدىڭ شىلدە ايىندا ستامبۇل قالاسىندا وتەدى.
ەسكە سالساق، COVID-19 پاندەمياسىنا دەيىن قازاقستان مەن تۇركيا اراسىندا اپتاسىنا 65 اۋە تاسىمالى جۇزەگە اسىرىلعان.
”ادىرنا” ۇلتتىق پورتالى
