قوستانايدا قالا پروكۋراتۋراسىنىڭ قوعامدىق مۇددەلەردى قورعاۋ ءبولىمىنىڭ اعا پروكۋرورى اسىلىپ ءولدى. وقيعانىڭ سەبەپتەرى انىقتالۋدا، - دەپ حابارلايدى "ادىرنا" ءتىلشىسى Our Kostanay باسىلىمىنا سىلتەمە جاساپ.
قوستاناي وبلىسى پروكۋراتۋراسىنىڭ ءباسپاسوز قىزمەتى قايعىلى وقيعا 5 مامىردا بولعانىن ناقتىلادى.
"قوستاناي وبلىسى اۋماعىنداعى ورمان بەلدەۋىندە قوستاناي قالالىق پروكۋراتۋراسىنىڭ قوعامدىق مۇددەلەردى قورعاۋ ءبولىمىنىڭ اعا پروكۋرورى دارحان بيساحالوۆتىڭ ءمايىتى اعاشتان تابىلدى. 28 جاستاعى پروكۋرور اسىلىپ ءولدى»، - دەپ حابارلادى باسىلىم.
ەر ادامنىڭ ارتىندا ايەلى مەن كىشكەنتاي قىزى قالدى دەيدى.
"پروكۋروردىڭ ءوز-وزىنە قول جۇمساۋ فاكتىسى سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلدى، قوستاناي وبلىسىنىڭ پوليتسيا دەپارتامەنتى تەرگەۋ جۇرگىزىپ جاتىر. وقيعانىڭ سەبەپتەرى انىقتالۋدا", - دەپ حابارلايدى پورتال پروكۋراتۋرانىڭ تۇسىنىكتەمەلەرىنە سىلتەمە جاساپ.
دارحان بيساحالوۆ ەڭبەك جولىن دەنيسوۆ اۋداندىق پروكۋراتۋراسىنىڭ پروكۋرورى بولىپ باستادى. سوڭعى لاۋازىمى – قوستاناي قالاسى پروكۋراتۋراسىنىڭ قوعامدىق مۇددەلەردى قورعاۋ ءبولىمىنىڭ اعا پروكۋرورى. پروكۋراتۋرا ورگاندارىنداعى جۇمىس ءوتىلى – 4 جىل.
"ادىرنا" ۇلتتىق پورتالى
