جاڭاوزەندە 11 سىنىپ وقۋشىسى مەن ونىڭ اكەسى سوققىعا جىعىلعان. وقيعا زارداپ شەككەن وقۋشىنىڭ ءۇيىنىڭ ماڭىندا بولعان. پوليتسيا اتالعان جايت بويىنشا قىلمىستىق ءىس قوزعادى. بۇل تۋرالى Lada.kz جاريالادى، دەپ حابارلايدى، “ادىرنا” ۇلتتىق پورتالى.
دەرەككوزدىڭ مالىمەتىنە ساي، 16 ساۋىردە تۇلەكتى قۇرداستارى تاپ ءۇيىنىڭ ماڭىندا سوققىعا جىققان. بۇعان وقۋشىنىڭ جاقىندا شەتەل ۋنيۆەرسيتەتىنە گرانتقا تۇسكەنى سەبەپ بولعان، دەپ جازادى باسىلىم.
"بالاسىنىڭ سوققىعا جىعىلعانىن كورگەن اكەسى وعان كومەككە ۇمتىلعان، الايدا ول ءبىر توپ بالاعا شاماسى جەتپەي، اياعىنان جاراقات العان.
قازىرگى تاڭدا زارداپ شەككەن وقۋشى اتا-اناسىمەن بىرگە جاڭاوزەن كوپبەيىندى اۋرۋحانادا جاتىر. اقپارات بەرگەن دەرەككوز وقۋ ورنىنىڭ اكىمشىلىگى وقۋشىلارعا زارداپ شەككەن وقۋشىعا بارۋعا جانە بولعان جايت تۋرالى اقپاراتتى تاراتۋعا تىيىم سالعانىن حابارلاعان", - دەپ جازادى باسىلىم.
جاڭاوزەن كوپبەيىندى قالالىق اۋرۋحاناسى Lada.kz تىلشىسىنە ۇسىنعان اقپاراتتا 11 سىنىپ وقۋشىسىنا باس-ءميدىڭ جابىق جاراقاتى، ميدىڭ شايقالۋى، جاراقات، باس تەرىسىنىڭ پاريەتالدى ايماعىنىڭ تەرى استىنداعى گەماتوماسى، بەتىنىڭ، ەكى جاعىنداعى پاراوربيتالدى ايماقتىڭ كوگەرۋى، سونىمەن قاتار سول جاق تىزە بۋىنىنىڭ سىدىرىلۋى دەگەن دياگنوز قويىلعان. ال اكەسىنە سۇيەك ۇزىندىلەرىنىڭ ىعىسۋىمەن سول اياقتىڭ 2-ءشى جىلىك سۇيەگىنىڭ جابىق ۇساقتالعان سىنۋى دياگنوزىن قويدى.
ماڭعىستاۋ وبلىسى پوليتسيا دەپارتامەنتى جانجالعا قاتىسى بارلاردىڭ بارلىعى انىقتالعانى ايتىلعان.
"كامەلەتكە تولماعان بالالار پوليتسياعا اتا-اناسىمەن بىرگە جەتكىزىلگەن. اتالعان دەرەك بويىنشا قىلمىستىق ءىس قوزعالدى. بارلىق قاجەتتى تەرگەۋ ءىس-ارەكەتتەرى جۇگىزىلىپ جاتىر.
بۇعان قوسا وقيعاعا قاتىسى بار قۇقىقبۇزۋشىلاردىڭ اتا-اناسى نەمەسە زاڭدى وكىلدەرىنىڭ جاۋاپكەرشىلىگى ماسەلەسى قارالادى. اكىمدىك جانىنداعى كامەلەتكە تولماعانداردىڭ قۇقىعىن قورعاۋ جونىندەگى كوميسسياعا باعىتتاۋ ءۇشىن ماتەريال ازىرلەنىپ جاتىر. بارلىق كىنالى تۇلعا تىركەۋگە الىنادى", - دەلىنگەن پد حابارلاماسىندا.