Jańaózen qalasynda nóser jaýynnan 1 mektep pen 2 turǵyn úıdi sý basty. Sonymen qatar, 8 úıdiń aýlasyna jáne kóshelerge sý jınalǵan. Eshkim zardap shekken joq. Búgin nóser jańbyr toqtap, kommýnaldyq qyzmetter arnaıy tehnıkalarmen jınalǵan jaýyn sýyn sorýǵa kirisken. Aıta keteıik, óńirde kesheden beri nóser jaýyn jaýyp, turǵyndardy ábigerge saldy. Qaraqııa aýdanynyń aýmaǵynda taýdan sel júrip, tas joldarda júrý qıyndady, dep habarlaıdy "Adyrna" ulttyq portaly.
Qazirgi ýaqytta Jańaózen qalasynyń tótenshe jaǵdaılar bólimi ákimdikpen birlesip №3 órt sóndirý bóliminiń kommýnaldyq qyzmetterdiń arnaıy tehnıkalaryn jáne sý sorý qurylǵylaryn shyǵardy. Jańbyr sýyn sorý jumystary júrgizilip jatyr. Tótenshe jaǵdaılar departamentiniń 16 qyzmetkeri, 1 tehnıkasy men 3 motopompasy, sondaı-aq kommýnaldyq qyzmetterdiń 17 jumyskeri men 12 tehnıkasy jumyldyrylǵan.
5 mamyrda jańbyrdan keıin Qaraqııa aýdanynda sel júrgen. Kólik júrgizýshileri bólisken vıdeodan sý aǵyny Aqtaý men Jańaózen arasyn jalǵaıtyn tasjolǵa qalaı jetkenin kórýge bolady. Sondaı-aq júrgizýshiler jaýyn-shashynǵa baılanysty jol kórinbegenin aıtty.
6 mamyr kúni tańerteń jergilikti turǵyndar Jańaózendegi №22 mektepte, sondaı-aq Qaraqııa aýdany Bostan aýylyndaǵy orta mektepte sabaq toqtatylǵany týraly habarlaǵan.
"Qazgıdromet" sınoptıkteriniń boljamy boıynsha, Mańǵystaýda 6-7 mamyrda jańbyr jaýyp, jel kúsheıedi. 6 mamyrda Mańǵystaý oblysynyń basym bóliginde jaýyn bolady, soltústikte, batysta, oblystyń ortalyǵynda qatty jańbyr, naızaǵaı, burshaq jaýady. Kúndiz oblystyń ońtústiginde shańdy daýyl. Soltústikten, soltústik-shyǵystan soqqan jel oblystyń basym bóliginde 15-20, soltústik-batysta, soltústik-shyǵysta ekpini 23-28 m/s jetedi.
Aqtaýda 6 mamyrda túnde qatty jańbyr, naızaǵaı, burshaq bolady. Soltústik, soltústik-shyǵystan kúndiz jel soǵady, ekpini 15-20 m/s jetedi. Mańǵystaý oblysynyń TJD aımaq turǵyndaryna jeke qaýipsizdik sharalaryn saqtaýdy usyndy. Sondaı-aq, turǵyndarǵa balalardy erekshe baqylaýǵa alýǵa, qaraýsyz qaldyrmaýǵa keńes berildi. Mańǵystaýlyqtarǵa asa qajet bolmasa, dalaǵa shyqpaý usynylady. Jelden úı qabyrǵalary mańynda jasyrynýǵa bolmaıdy. Óıtkeni shatyrdan túrli materıal qulaýy múmkin.
Beınematerıaldardy Telegram paraqshamyzdan kóre alasyz.
"Adyrna" ulttyq portaly
