قازاقستاندىق، رەسەيلىك جانە كانادالىق تولقۇجاتى بار ايەل قازاقستان رەسپۋبليكاسىنىڭ ازاماتتىق تۋرالى زاڭناماسىن بۇزعانى ءۇشىن مەملەكەتتىك شەكارادان ءوتۋ كەزىندە "ۇرلىتوبە" شەكارالىق باقىلاۋ بولىمشەسىنىڭ وتكىزۋ پۋنكتىندە ۇستالدى، دەپ حابارلايدى "ادىرنا" ۇلتتىق پورتالى.
ۇستالعان ايەل سوتتا 2017 جىلدىڭ قاراشاسىندا كانادا ازاماتتىعىن العانىن، ال 2022 جىلدىڭ ناۋرىزىندا رەسەي ازاماتتىعىن العانىن ايتقان. بىراق قازاقستاندىق تولقۇجاتىن وتكىزبەگەن جانە شەتەل ازاماتتىعىن العانىن ايتپاعان.
"ايەل ادام زاڭنان بەيحابار بولعانىن ايتىپ، تولىعىمەن كىناسىن مويىندادى. جالعىز ۇلى مەن نەمەرەسى كانادادا تۇراتىنىن، ال قازاقستاندا تۋىستارى جوعىن ايتىپ، ەلدەن شىعارماۋىن سۇرادى", - دەدى پاۆلودار وبلسىنىڭ جەلەزين اۋداندىق سوتىنىڭ ءباسپاسوز قىزمەتى وكىلدەرى.
"سوت ايەلدى اكىمشىلىك قۇقىق بۇزۋشىلىق كودەكسىنىڭ 496-بابىنىڭ 2-بولىگى بويىنشا كىنالى دەپ تانىپ، قازاقستاننان شىعارىپ جىبەرۋ تۇرىندە اكىمشىلىك جازاعا تارتىلدى", - دەلىنگەن حابارلامادا.
سوت ۇكىمى زاڭدى كۇشىنە ەندى. سوت قۇجاتىندا زاڭ بۇزعان ايەل قازاقستاننان 10 تاۋلىك ىشىندە كەتۋى كەرەگى ايتىلعان.
"ادىرنا" ۇلتتىق پورتالى.
