كيەۆتە قازاقستان مەن ۋكراينا پوليتسياسىنىڭ بىرلەسكەن ارنايى وپەراتسياسى بارىسىندا deepfake تەحنولوگياسىن قولدانعان ءىرى الاياقتىق call-ورتالىعى ۇستالدى، دەپ حابارلايدى "ادىرنا" ۇلتتىق پورتالى.
قىلمىستىق توپتىڭ مۇشەلەرى وزدەرىن ادۆوكات نەمەسە مەملەكەتتىك مەكەمە قىزمەتكەرى رەتىندە تانىستىرىپ، قازاقستان، ەۋرووداق جانە تمد ەلدەرىنىڭ ازاماتتارىنا قوڭىراۋ شالعان. ولار جالعان ينۆەستيتسيالىق پلاتفورمالارعا الدانىپ قالعان جابىرلەنۋشىلەرگە قارجىسىن قايتارىپ بەرەمىز دەگەن ۋادە بەرىپ، «سوت الىمدارى» مەن «كوميسسيالار» سىندى تولەمدەردى تالاپ ەتكەن. كەي جاعدايلاردا ءتىپتى ازاماتتاردى نەسيە الۋعا دا يتەرمەلەگەن.
سەنىم ۇيالاتۋ ءۇشىن الاياقتار deepfake تەحنولوگياسىن قولدانىپ، جالعان بەينەقوڭىراۋلار مەن قۇجاتتاردى كورسەتكەن.
تەرگەۋ دەرەكتەرىنە سايكەس، زارداپ شەككەندەردىڭ سانى 4,5 مىڭنان اسقان. ولاردىڭ اراسىندا قازاقستان ازاماتتارى دا بار. كەلتىرىلگەن شىعىن كولەمى 4 ميلليون اقش دوللارىنان اسىپ كەتكەن.
Call-ورتالىق شامامەن 30 ادامنان تۇرعان. ۇيىم ناقتى يەرارحيا بويىنشا جۇمىس ىستەگەن. تۇسكەن قاراجات كيەۆتەگى ەليتالىق جىلجىمايتىن مۇلىككە، جەر تەلىمدەرىنە جانە قىمبات كولىكتەرگە جۇمسالعان. ءاربىر وپەراتور زاڭسىز الىنعان اقشانىڭ بەلگىلى ءبىر پايىزىن سىياقى رەتىندە الىپ وتىرعان.
جەدەل-ىزدەستىرۋ شارالارى كەزىندە 11 مەكەنجاي بويىنشا ءتىنتۋ جۇرگىزىلىپ، 41 كومپيۋتەر، 24 ۇيالى تەلەفون جانە ونداعان SIM-كارتا تاركىلەنگەن. سونداي-اق قازاقستان ازاماتتارىنىڭ نومىرلەرى جازىلعان دەرەكتەر قورى انىقتالدى.
قازىرگى ۋاقىتتا 15 ۋكراينا ازاماتى ۇستالدى، ولاردىڭ توعىزى ۋاقىتشا ۇستاۋ يزولياتورىنا قامالدى. تەرگەۋ جالعاسۋدا، پوليتسيا جاڭا ەپيزودتاردى جانە قىلمىستىق توپتىڭ وزگە مۇشەلەرىن انىقتاپ جاتىر.
