ءوز ەلىندە ءجۇرىپ ءجۇرىپ ءتىلىنىڭ مارتەبەسى ءۇشىن كۇرەسەتىن، ءوز تىلىندە سويلەگەنى ءۇشىن قۋعىندالاتىن، ءوز ەلىندە وزگە تىلدەر العا شىعىپ ءوز ءتىلى وگەي ءتىل بولاتىن، ءوز بالاسى ءوزىنىڭ ءتىلىن وزەگىنەن تەبەتىن، بىزدەن باسقا ەل بار ما ەكەن، وسى؟!
بابادان قالعان باي دا شۇرايلى قازىنالى قازاق ءتىلىنىڭ، ابايدىڭ ءتىلىنىڭ ءوز ەلىندە وگەيدىڭ كۇنىن كەشىپ جۇرگەن بۇگىنگى مۇشكىل حالىنە قاراپ «ءوز تىلىنە جانى اشىمايتىن نەتكەن سورلى ەل ەدىك»،- دەپ ايعايلاپ تۇرىپ جىلاعىڭ كەلەدى. بىراق قۇر جىلاعاننان نە پايدا؟
قاراپايىم قارا قازاقتىڭ مۇڭ-زارىن، ۇلتىنىڭ بولاشاعىنا، ەلىنىڭ ەرتەڭىنە الاڭداعان انالاردىڭ ءۇنىن ۇلتى قازاق پرەزيدەنتىڭ، بيلىگىڭ ەستىمەسە نەمەسە ەستىگىسى كەلمەسە، نە ءۇمىت، نە قايىر؟
29 مامىردا ەلوردامىزداعى №93 مەكتەپ-ليتسەيدىڭ ماڭىندا تۇراتىن جيىرما شاقتى اتا-انا ورىس سىنىپتارىن اشسىن دەپ جاتىر دەگەندى ەستىپ، اراسىندا ارداگەر اقساقالدارىمىز، ءماجىلىس دەپۋتاتتارى، جازۋشىلار، ونەر ادامدارى، جۋرناليستتەرى، قوعام قايراتكەرلەرى بار، ءبىر توپ ءتىل جاناشىرلارى مەكتەپكە جينالدىق.
جينالعان اتا-انالارعا قاراپ وتىرسام، ءبارى ءوزىمنىڭ قازاعىم. قازاق بولعاندا، اتى قازاق، ءتىلى ورىس، زاتى وگەيلەر. جاس اتا-انالار. قازاقتىڭ ءاپ-ادەمى ەسىمدەرىن يەمدەنگەن، بىراق قازاق تىلىنە جانى قاستار. 30-جىلعى جۇيەمىزدىڭ «جەمىستەرى».
30 جىلدا ۇلتتىق تاربيەدەن جۇرداي بولىپ تاربيەلەنگەن، ۇلكەندى ۇلكەن دەپ قۇرمەتتەمەيتىن، ءجون سوزگە توقتامايتىن، تىڭداۋ دەگەندى بىلمەيتىن، شاپىلداپ بەتتەن الىپ، توسكە شاۋىپ تۇرعان جاستار.
ەلوردامىزدىڭ قۇرمەتتى اقساقالدارىنىڭ سوزىنە قارسى شىعىپ، بوعاۋىز، بەيادەپ ءسوز سويلەپ، تۇرپايى ءىس-ارەكەت جاساپ وتىرعان قازاقتىڭ (؟!) جىگىتىنە، نە ءسوز ۇقپايتىن، نە سوزگە توقتامايتىن قازاقتىڭ (؟!) جاپ-جاس كەلىنشەكتەرىنە قاراپ جانىم تۇرشىكتى. ولارعا قاراپ وتىرىپ مۇستافا شوقايدىڭ «ۇلتتىق قۇندىلىقتاردان جۇرداي رۋحتا تاربيەلەنگەن ۇرپاقتان حالقىمىزدىڭ قاجەتى مەن مۇددەسىن جوقتايتىن پايدالى ازامات شىقپايدى»،-دەگەن ءسوزى ويىما قايتا-قايتا ورالا بەردى.
ال ەندى ەڭ سوراقاسى جينالىستان شىعىپ بارا جاتقان كەلىنشەكتىڭ ء(وز قازاعىڭنىڭ؟!) «مەن سويلەگەندەردىڭ بارلىعىنىڭ ءسوزىن جازىپ الدىم. تولىق ۆيدەو جاسادىم. مۇنى رەسەيگە، پۋتينگە جىبەرەمىن، شاعىمدانامىن»،-دەگەنىن ەستىگەندە شالقامىزدان تۇسە جازدادىق.
اللا ساقتاسىن، «ىشتەن شىققان جاۋ جامان» دەمەكشى، اراڭدا وسىنداي دۇشپاندارىڭ جۇرسە، جاۋدى سىرتتان ىزدەپ تە قاجەتى دە جوق. «وتىراردىڭ قاقپاسىن اشقانداي»، قاقپانى ىشتەن وزدەرى-اق اشىپ بەرە سالادى ەكەن عوي دەگەن وي كەلدى، ويىمنان ءوزىم شوشىدىم.
شىنىمدى ايتسام، كورشى ەلدىڭ پرەزيدەنتىنە «قاتتى ريزا بولدىم». نەگە دەيسىزدەر عوي. ءوز ەلىنىڭ حالقى ونى «قۇداي» كورەدى، اق دەگەنى العىس، قارا دەگەنى قارعىس. «ورىس الەمى» كۇشتى ناسيحات قۇرالى، يدەولوگياسى مىقتى! ءتىپتى ءومىرى ورىس ەلىندە تۇرىپ كورمەگەن، ولاردىڭ وزگە ۇلتقا دەگەن پيعىلىن سەزىنبەگەن، ءبىزدىڭ قاراكوزدەرىمىزدىڭ جۇرەگىن جاۋلاعانى سونشالىقتى، «پۋتينگە شاعىمدانامىن»،-دەپ، تاۋەلسىز ەلى بار، ءوز پرەزيدەنتى بولا تۇرا، پۋتينگە «ارقا سۇيەپ»، سونى «كۋمير» ساناپ وتىر.
مىنە، يدەولوگيا، مىنە جاستارمەن جۇمىستىڭ جەمىسى! «جالاۋلاتىپ، ۇرانداتىپ» جۇرگەن 30 جىل تاۋەلسىزدىك العالى بەرى جەتكەن جەتىستىگىمىز – وزگە يدەولوگيامەن قارۋلانعان تۇتاس ءبىر ۇرپاقتى ءوسىرىپ شىعارىپپىز. وبالى كىمگە؟
«قاڭتار وقيعاسىنا» اسىرە دىنشىلدەر ارالاستى دەسەك، مىنانداي يدەولوگياعا ۋلانعاندار دا ولاردان اسىپ تۇسپەسە، كەم ەمەس. ولاردىڭ قاتارىن جىلدان-جىلعا كوبەيىپ بارا جاتقان، شالا مەكتەپتىڭ (ارالاس) ورىس سىنىبىندا وقيتىن قاراگوزدەرىمىز كوبەيتىپ جاتقانىن تاعى ۇمىتپايىق. ءتىلى باسقا، ءدىلى باسقا، قازاقتىڭ قاراكوز ءجاميلا، ايگەرىمدەرى «ورىس الەمىنىڭ» ولمەۋىنە «ولشەۋسىز ۇلەس» قوسىپ جاتىر، وزدەرىنىڭ ورنىن باسار ۇرپاعىن دا وزگە يدەولوگياعا «تابىندىرىپ» تاربيەلەپ جاتىر. بۇعان قاراپ، ماعجان جۇماباەۆتىڭ مىنا ءسوزى ويعا ورالادى: «ءار ۇلتتىڭ بالاسى ءوز ۇلتىنىڭ اراسىندا، ءوز ۇلتى ءۇشىن قىزمەت قىلاتىن بولعاندىقتان، تاربيەشى بالانى سول ۇلت تاربيەسى مەن تاربيە قىلۋعا مىندەتتى».
وسى جيىننان كەيىن ۇزاق ۋاقىت ءوز-وزىمە كەلە المادىم. قانداي ۇرپاق تابيەلەگەنبىز، ۇلت بولاشاعى قالاي بولماق، ەل بوپ قالا الامىز با؟ ۇلانعايىر جەرىنىڭ ءبىر شەتىن شاشاۋ شىعارماي قورعاعان بابالارىمىز ول جەردىڭ بۇگىنگى مۇراگەر ۇرپاعى تۋعان تىلىنەن، دىلىنەن، دىلىنەن بەزگەن بەزبۇيرەك بولىپ اق ساقالدى قارتتاردى بالاعاتتايتىنىن بىلسە، نە دەر ەدى؟،-دەگەن ؟،-دەگەن سانسىز سۇراق ساناما مازا بەرمەي، ۇيقىم ابدەن قاشتى.
قۇرمەتتى پرەزيدەنت، بيلىكتەگى اعالار، دەپۋتاتار، باۋىرلار! حالقىم!
حالقى مىنانداي جىك-جىك، داي-داي بولعان، اقىرىنداپ ىشتەن ءىرىپ جاتقان ەلدە قايداعى «جاڭا قازاقستان»؟ تاۋەلسىز ەلى بار، تۋى بار مەملەكەتتىڭ ازاماتىنىڭ «وزگە ەلدىڭ ورمانىنا قاراپ ۇلۋىنىڭ» ءتۇبى جاقسىلىققا اپارمايدى.
ءوز ۇلتىنىڭ تىلىندە سويلەمەگەن، تاربيەسىن، ءتالىمىن كورمەگەن ۇرپاق ءوز ەلىندە ءومىر ءسۇرىپ، سۋىن ءىشىپ، نانىن جەپ، وزگە ەلدىڭ پاتشاسىنا ارقا سۇيەپ، ءتىلىن، ءدىلىن مارتەبە كورەدى. ويبۋي، 50 ەلدىڭ قاتارىندامىز، رۋحاني جاڭعىرىپ جاتىرمىز، ۇلتتىق كودىمىز ويانىپ جاتىر دەگەنىمىز قايدا؟! جەتكەن جەرىمىز وسى ەكەن.
ايتپاقشى، «جيىلىپ الىپ وپپوزيتسيا كەلدى» دەدى بىزگە. ۇلكەننىڭ دە، كىشىنىڭ دە ءسوزى وتپەيتىن جاس اتا-انالارعا قاراپ بويىمدى ەلىمنىڭ ەرتەڭىنە دەگەن ۇرەي، قورقىنىش بيلەدى. ءبىر ۇلتتى ەكىگە ءبولىپ، ەكىنشىسىن رۋحاني وزەگىنەن ايىرعان 30-جىلدىق جۇيەگە، ۇرپاعىمىزعا ۇلتتىق قۇندىلىقتى سىڭىرەيىك، ۇلتتىق تاربيە بەرەيىك،-دەپ شىرىلداپ جۇرگەنىمىزدى قولدامايتىن، «نەمەنە ارتقا تارتىپ ءجۇرسىز، جاھاندانۋ زامانى، ءبارى وزگەرەدى، جاساپ جۇرگەنىڭىزدىڭ قۇنى بەس تيىن» دەگەن «ۇلتتىق قۇندىلىقتىڭ، ۇتتىق تاربيەنىڭ جاۋلارىنا» قانىم قارايدى.
رۋحاني وزەگىنەن ايىرىلعان، ورىستىڭ تاربيەسىن كورگەن جاستاردىڭ كوبىنىڭ «ۇلكەنگە قۇرمەت» دەگەننەن جۇرداي، بەتتەن الىپ تۇراتىن ونەگەسىز، ورەسىز، رۋحسىز، تەكسىز بولاتىنىنا تاعى كوزىم تاعى جەتتى.
ايتپاقشى، كەيبىرەۋلەر مۇنداي مىنەزدى قازاقشا وقىعان بالالار ۇيالشاق، ورىسشا وقىعاندار ولاردان الدەقايدا الدا، «ءوز ويىن اشىق ايتا الاتىن، مىقتى» دەپ جاتقاندارعا ايتارىم، ۇرپاقتى مۇنداي سوراقى قىلىق كورسەتۋگە تاربيەلەيتىن، وزگە ەلدىڭ ءدىلى مەن ءتىلى مەنىڭ انا تىلىمنەن ساداعا كەتسىن. تۋعان تىلدەن بەزگەندەر پاۋستوۆسكيشە ايتقاندا، «تۋعان تىلىنە جانى اشىماعان ادام جاندىك».
وسىنىڭ بارلىعىن كورىپ وتىرعان ءار ۇلت جاناشىرى تەك ءتىلدىڭ عانا ەمەس، ەلدىڭ ەلدىگى مەن ۇلتتىڭ بولاشاعىنا قاۋىپ ءتونىپ تۇرعانىن ۇقتىق.
مەملەكەت قۇراۋشى ۇلتتىڭ ءتىلى، قازاقتىڭ قانى مەن جانى سانالاتىن قازاق ءتىلىنىڭ ابىرويى مەن بەدەلى بولماسا، قازاق ءتىلى ىنتىماق پەن بىرلىكتىڭ تىلىنە اينالماسا، مەملەكەتتىك ءتىلىنىڭ قادىر-قاسيەتى جوق «جاڭا قازاقستان» كىمنىڭ قازاقستانى بولماق؟!
ءتىل – ۇلتتىڭ رۋحاني وزەگى، ال وزەگىنەن ايىرىلعان ۇلت ولەدى.
تاۋەلسىز مەملەكەتتە، ەگەمەندى ەلدە تۇرىپ جاتقان، تاۋەلسىز ۇلتتىڭ ءوز پرەزيدەنتىن ەمەس، وزگە ەلدىڭ باسشىسىن «ءپىر تۇتىپ»، قورعاۋشى ساناعانى، ءوز پرەزيدەنتىنەن ەمەس، وزگەنىڭ پرەزيدەنتىن اراشا سۇراعانى دابىل قاعارلىق، ويلانتارلىق احۋال. قاتتى ويلانىڭىزدار. ءتىل ماسەلەسى شەشىلمەي، بۇل ءبولىنۋدىڭ ارتى جاقسىلىققا اپارمايدى. قورقىتپايمىز، بىراق ءتۇپتىڭ-تۇبىندە «قاڭتار وقيعاسىنان دا» اسىپ تۇسپەسىن. جەر يەسى، ەل يەسى، قازاق ۇلتىنىڭ ازاماتى رەتىندە، انا رەتىندە قورقامىن. مۇنداي ساناسى جات يدەولوگيامەن ۋلانعاندارعا قۇرماق بولىپ جاتقان «جاڭا قازاقستاننىڭ» تۇككە قاجەتى جوق، ولارعا كورشىدە نە بوپ جاتقانى قىزىق، ولار سولاردىڭ سويىلىن سوعادى، سونى تۇسىنىڭىزدەر.
مەنىڭ بالا كەزىمدە ورىستانعان تسەلينوگرادتا ورىستار اۋزىمىزدى اشقىزباۋشى ەدى، ەندى ولار ۇندەمەيدى. ولاردىڭ ورنىن ءوز وگەيلەرىمىز باستى. جانىما باتاتىنى سول. ءتىلىم ءۇشىن 15 جاسىمدا ورىس ارالاسقان اۋىلعا كوشىپ كەلگەننەن باستاپ «كۇرەستى» باستاپ ەدىم. مىنە، 52 كەلدىم. ءالى ءتىلىمنىڭ بەيشارا كۇيىن كورىپ كۇيىنەمىن. انامنىڭ سۇتىمەن 72 تامىرىما بويلاي سىڭگەن، قاسيەتتى ءتىلىمنىڭ ءوز ۇرپاعىنا قادىرلى بولعانىن، توردەن ورىن العانىن كورمەي كەتەمىن بە؟،-دەپ قورقامىن.
وسىلاي كەتە بەرسەك، كۇنى ەرتەڭ قۇرماقشى بوپ جاتقان «جاڭا قازاقستاندا» قازاقشا سويلەپ، قازاقشا ءتۇس كورەتىندەردىڭ ءبارىن «فاشيست» دەرسىزدەر، بالكىم. قازاقشا تاربيەلەپ جاتقان ۇرپاعىمىزدىڭ ەرتەڭىنە الاڭدايمىز. «جاڭا قازاقستان» دەيسىزدەر، انا ءتىلىمىز باسىن بيىك كوتەرىپ، كەۋدەسىن كەرە ەسىكتەن كىرە المايتىن ەلدە ەسكى ويلايتىن، «كونە» تىلدە سويلەيتىن قازاققا ورىن جوق شىعار، ءتىلى دە، ءدىلى دە وزگەرگەن جاڭا قازاقتار عانا تۇراتىن بولار، وندا؟!
ءبىز سياقتى ەسكى قازاقتار اسان قايعى بابام سياقتى «جەر ۇيىقتى ىزدەپ كەتەمىز بە»؟ ايتپاعىم، وندا مەملەكەتتىڭ اتاۋىندا وزگەرتە سالىڭىزدار. «قازاق» دەگەن قاسيەتتى ءسوزدى اماناتتاپ كەتكەن باتىر، تەكتى، رۋحتى بابالاردىڭ ارۋاعىنان ۇيات بولار.
ءتىل تاعدىرى عانا ەمەس، بۇتكىل ۇلت تاعدىرى قىل ۇستىندە تۇر، ال ءبىز بولساق، ءالى سول، سوزبەن قاتىرىپ، كوسەمسىپ ءجۇرمىز. وتىز جىل بولدى، قۇر سوزدەن، ۇراننان «ءمۇيىز شىقسا»، باياعىدا-اق شىعار ەدى عوي؟! مەملەكەت قۇراۋشى ۇلتتىڭ ءتىلى - بىرىكتىرەر كۇش بولماي، «ءبىر ءتىل، ءبىر ۇلت» يدەولوگياسى بولماي، ءبارى بەكەر. «ءتىلى جوق ۇلت، ءوزى جوق ۇلت».
قازاق عانا ءتىلىن دە، جەرىن دە، وتانىن دا اناعا تەڭەگەن. ال بالا ءۇشىن انادان قاسيەتتى كىم بار؟! ال ءبىز بولساق، سول انامىزدى ءوز قولىمىزبەن ءوزىمىز بۋىندىرىپ، تۇنشىقتىرىپ جاتىرمىز. بۇيتە بەرسەك، انا ءتىلىن وزگە ەمەس، ءوزى قولىمەن «بۋىندىرىپ ولتىرگەن» ۇلت بولىپ، تاريحتا قالامىز.
قورقىنىشتى… مەملەكەت قۇراۋشى ۇلتتىڭ ءتىلى، قازاقتىڭ قانى مەن جانى سانالاتىن قازاق ءتىلىنىڭ ابىرويى مەن بەدەلى بولماسا، قازاق ءتىلى ىنتىماق پەن بىرلىكتىڭ تىلىنە اينالماسا، مەملەكەتتىك ءتىلىنىڭ قادىر-قاسيەتى جوق «جاڭا قازاقستان» كىمنىڭ قازاقستانى بولماق؟! ءتىل – ۇلتتىڭ رۋحاني وزەگى، ال وزەگىنەن ايىرىلعان ۇلت ولەدى.
قازىر ەلىمىز شەشۋشى، بەتبۇرىستى جاعدايدى باستان كەشىپ جاتىر.
تاريحشىلار ايتپاقشى، «تومەندەگىلەر بۇرىنعىشا ءومىر سۇرە المايتىن، جوعارىداعىلار تومەندەگىلەردى بۇرىنعىشا باسقارا المايتىن» كارى تاريحتىڭ قاراپايىم زاڭدىلىعى ەمەس پە؟ حالىقپەن ساناساتىن كەز جەتتى. حالىق – تەڭىز. تەڭىزدى تولقىتا بەرمەڭىزدەر. جاندى جەرىمىز ءتىل ءۇشىن كۇيسەك، كۇيىپ-اق كەتەيىك دەپ جۇرگەن قالىڭ قازاقتىڭ مۇددەسىن اياققا تاپتاماڭىزدار.
ءدال قازىر تەك ءتىل تاعدىرى عانا ەمەس، ۇلت تاعدىرى دا قىل ۇستىندە تۇرعانىن ۇمىتپاڭىزدار. بۇگىن بولماسا، ەرتەڭ ءبارى كەش بولادى.
قادىرلى حالقىم، ءوزىن قازاق دەپ سانايتىن بارشا اعايىن! قارا شاڭىراق ۇعىمى كەڭ. بۇل ۇعىمعا ۇلت تا، ءتىل دە، ءدىل دە، جەر دە، جەر يەسى دە، ۇلتتىق قۇندىلىق تا سىيىپ كەتەدى. مارقۇم مىرزاعام (مىرزاگەلدى كەمەل) 2019 جىلى «قازاقتىڭ قارا شاڭىراعى شايقالىپ تۇر، قارىنداسىم»،-دەپ ەدى. كەشەگى جيىندا جيىلعاندارعا قاراپ، مىرزاعامنىڭ ءسوزىنىڭ شىندىعىنا تاعى كۋا بولدىم.
قارا شاڭىراقتى شايقالتىپ جاتقاندار 30 جىلعى جۇيەنىڭ ميى شايقالعان «ونىمدەرى». بۇگىندە ۇلتىمىز جىك-جىككە ءبولىنىپ كەتكەن ەكەن. سالافيلەر، اسىرا دىنشىلدەر، ورىسشىلار جانە از عانا ناعىز قازاقتار. ءبىز يدەولوگيالىق سوعىستا جەڭىلگەنىمىزدى مويىنداۋىمىز كەرەك.
ەل اناسى، بەلگىلى قوعام قايراتكەرى، ۇلت رۋحانياتىنىڭ جاناشىرى ساۋلە مەشىتباەۆا اپامنىڭ جۇرەگىنەن شىققان سوزدەرى، جان ايعايى قاي قازاققا بولسىن وي سالسىنشى:
دەپۋتاتتاردىڭ ىشىندە ساناۋلى عانا ءتىل ءۇشىن شىرىلداپ جۇرگەندەر بار. سونىڭ ءبىرى قازىبەك يسا. ول «ەرتەڭ ءتىلىم ولسە، مەن بۇگىن ولەم»،-دەپ داعىستاندىق اقىن راسۋل گامزاتوۆتان كەم ايتىپ جۇرگەن جوق. ونى دا ەرتەڭ لاقتىرسا، قايتەسىڭدەر، قايداسىڭدار، اعايىن!
بۇل ۇلكەن قاسىرەت، ۇلتىم. ەرتەڭ بولاتىن رەفەرەندۋم ناتيجەسى بەلگىلى. سەبەبى قازاق شالا قازاق، ماڭگۇرت قازاق، مامبەت قازاق، باي قازاق، اسىرە ءدىنشىل قازاق دەپ ءبولىنىپ كەتكەن، سولاي ءبولىپ تاستاعان.
اعايىن، بيلىكتى دە نيەتىمىزگە قاراي بەردى. ەندى قۇر ءسوزدى قويىپ، ىسكە كوشەتىن كەز كەلدى. ايعايسىز، سابىرمەن ۇلت بولىپ پرەزيدەنت ق.توقاەۆقا اشىق حات جازايىق، قابىلداسىن. باس-باسىنا بي بولعان، اقىلشى كادرلارى كوبەيىپ كەتتى عوي. ءدال وسى ماسەلە كەزەك كۇتتىرمەيدى، اينالايىن قازاعىم؟
مۇنى دا 2-3 كۇن شۋلاپ، قويا سالماي، ىسكە كىرىسەلىك. اسىلى وسمان اپامىزدان ارتىق كىم ايتادى، شىرىلداپ جۇرگەلى نەشە جىل. بيلىكتە ەستيىن دەگەن نيەت جوق. كەشەگى جيىنعا امانجول التاي دا بارىپتى. جۇرەگىنىڭ قان جىلاعانى ءسوزسىز. سولار باس بولسىن. بۇل باستاماسى عانا كەش بولماي تۇرعاندا قالىڭ قازاق بولىپ قولدايىق، اينالايىندار، ويانىڭدار. ۇيىقتاپ جاتىپ، ءتىلسىز ۇلتقا اينالىپ كەتپەيىك.
قىلىشىنان قان سورعالاعان كەڭەس زامانىندا ولمەگەن قايران ءتىلىمدى قىزىم، ءوزىڭ ايتقانداي، ءوز اۋزىمىز وزىمىزگە جەتكەندە «ءوز قازاعىم ءولتىرىپ جاتىر»، «سەكسەۋىل ساياساتىن» ءوز ۇل-قىزدارىم جۇزەگە اسىرىپ جاتىر، اتتەگەن-اي، اينالايىن». ەل اناسىنىڭ جۇرەگىنەن شىققان، ەڭىرەپ ايتقان جان ايعايى بۇل!
كەشەگى جيىندا بولعان قۇرمەتتى دەپۋتاتتار، قازىبەك يسا، امانجول ءالتاي، اعالار، مەكتەپتە وتكەن جيىندا نە بولعانىن ءوز كوزدەرىڭىزبەن كوردىڭىزدەر. ءبىر شوعىر «ساناسى ۋلانعان» جاستار اقساقالداردى دا، بيلىك وكىلدەرىن دە تىڭداپ جاتقان جوق. ءبىزدىڭ قاراپايىم حالىقتىڭ ءۇنى بيلىككە جەتپەيدى، ءبىزدى ەشكىم ەستىمەيدى. سوندىقتان انا ءتىلىمىز دە، قازاقتىڭ ءدىلى مەن قۇندىلىعى دا، قازاقتىڭ ءوزى دە سىزدەرگە امانات. اماناتقا قيانات جاساماڭىزدار. بارشامىز ءتىل بولاشاعى ءۇشىن، ۇلت بولاشاعى ءۇشىن رۋحاني «كۇرەستە» بىرگە بولۋىمىز كەرەك. ءتىل ءۇشىن قالىڭ قازاقتىڭ جانى شۇبەرەككە ءتۇيۋلى.
بابالار اماناتتاپ كەتكەن قاراشاڭىراعىمىزدى ساقتاپ قالايىق، ءتىلىمىزدى تۇنشىقتىرمايىق، قۇندىلىعىمىزدى قۇرمەتتەيىك! قر ازاماتى رەتىندە تاۋەلسىز ەلدىڭ ازاماتى بولا تۇرا وزگە مەملەكەت باسشىسىن ءوز ەلىنىڭ پرەزيدەنتىنەن بيىك قويىپ، ءوز پرەزيدەنتىن پرەزيدەنت دەپ سانامايتىن ايەلگە قاتاڭ شارا قولدانىلسىن. مەملەكەتتىك ءتىلدى قورعاعانداردى ەلدەن الاستاتقانشا، وسى ايەلدى دە مەملەكەت اۋماعىنان شىعارسىن. قر ازاماتتىعىنان ايىرسىن.
شاكەن تۇرار ساتتارقىزى،
«ەل انا» سايتىنىڭ ۇيلەستىرۋشى، ءتىلشىسى
