"شىڭعا ورلەۋ" الەۋمەتتىك كلۋبىنىڭ جەتىسۋ اۋداندىق بولىمىندە 03.05.22 كۇنى كورنەكتى عالىم، فيلوسوفيا عىلىمدارىنىڭ دوكتورى، ۇلتتىق عىلىم اكادەمياسىنىڭ اكادەميگى، كسرو جوعارى مەكتەبىنىڭ ەڭبەك سىڭىرگەن قايراتكەرى دوسمۇحامبەت كىشىبەكوۆپەن كەزدەسۋ وتكىزىلدى، دەپ حابارلايدى «ادىرنا» ءتىلشىسى.
كەش بارىسىندا عاسىرعا جۋىق عۇمىرىندا قازاق ەلىنىڭ باسىنا كەلگەن ناۋبەتتەردىڭ بارىنەن امان وتكەن ابىز قاريا ءوزىن قورشاي جاۋدىرىپ وتىرعانداردىڭ 6- 9 جاسار ەكەنىن بىردەن باعدارلاپ، سول جاس دەڭگەيىندەگىلەرگە ءسىڭىمدى ءدارىستى وقىدى.
اتا ءسوزىنىڭ الدىندا كلۋبتىڭ ۇستاز تالىمگەرى گۇلزيا ساياساتقىزى اۋكاشوۆا عىلىم عانا ەمەس ەڭبەك، سوعىس ارداگەرىنىڭ قايتالانباس عۇمىرناماسىن تاربيەلەنۋشىلەرگە بايانداپ وتكەن ەدى.
«ءبىزدىڭ حالقىمىز الەمدەگى ەڭ ومىرشەڭ، ويشىل دا وزىق حالىق. ولاردىڭ بۇكىل دۇنيەتانىمى، سالتى، ءداستۇرى، ۇستانىمى، تىنىس- تىرشىلىگى - فيلوسوفيا. سەندەردىڭ وسىنداي كلۋبتا اجەلەرىڭ قاتار ۇستاز- تالىمگەرلەردەن ءتالىم الىپ جاتقاندارىڭنىڭ ءوزى ۇلتتىق سانانىڭ، ۇلتتىق فيلوسوفيانىڭ جەمىسى»،– دەدى قاريا.
ءوز كەزەكتەرىندە بالدىرعاندار دا «ءبىزدىڭ جاسىمىزدا وسىرگەن قاۋىن سورتتارى قازىر بار ما؟»، «قازىر ەرتەگىلەر وقىپ ءجۇرمىن، تاعى نە وقۋىما بولادى؟» سىندى ءتۇرلى سۇراقتى قويدى.
وزدەرىنە تۇسىنىكتى جاۋاپتارىن العان وقۋشىلار كەش بارىسىندا ۇستازدارىنا قوسىلىپ ءان شىرقاپ، كۇي شەرتتى.
كەزدەسۋدە جۇرگىزۋشى ۇستاز - تالىمگەر ابىز قاريادان «ەلىڭىزدىڭ بولاشاعىنا، جاستار بولاشاعىنا سەنەسىز بە؟» دەگەن ساۋال بەردى.
«ماعان دەيىنگى قازاق تۇلعالارىنىڭ اراسىندا ەلدىڭ، جاستارتىڭ بولاشاعىنا سەنبەگەنى كەمدە- كەم. بابالار اماناتى ءسوزسىز اقتالادى»،– دەدى ول.
كەزدەسۋ سوڭىندا كلۋب تاربيەلەنۋشىلەرى وزدەرىنىڭ بولاشاقتا كىم بولاتىندىعى ، قانداي ماماندىقتى، كاسىپتى قالايتىندىقتارىن كەزەك-كەزەك ورىندارىنان تۇرىپ اتاپ شىقتى دا، اتالارىنان باتا سۇرادى. بالدىرعاندار ابىزبەن ەستەلىك سۋرەتكە ءتۇستى دە، ۇيلەرىنە تاراستى.
