رەسەي فەدەراتسياسىنىڭ باس پروكۋراتۋراسى قازاقستاندىق كاسىپكەر، Freedom Holding Corp. نەگىزىن قالاۋشى تيمۋر تۇرلوۆقا جانە بىرقاتار كومپانياعا قاتىستى ماسكەۋدىڭ تۆەر اۋداندىق سوتىنا تالاپ ارىز بەردى.
سوتتىڭ ەلەكتروندى كارتوتەكاسىندا اكىمشىلىك تالاپكەر رەتىندە رف باس پروكۋرورىنىڭ ورىنباسارى، ال جاۋاپكەرلەر قاتارىندا تيمۋر تۇرلوۆ، الەكسەي ششۋكين، سونداي-اق W-Empirical Holding Corp.، Freedom Holding Corp. جانە Freedom Finance Europe Ltd. كومپانيالارى كورسەتىلگەن.
ءىس بويىنشا تالاپتاردىڭ ناقتى مازمۇنى ازىرگە جاريالانعان جوق. الدىن الا سوت وتىرىسى 15 قازانعا بەلگىلەنگەن.
Freedom Holding ءباسپاسوز قىزمەتى سوتقا بەرىلگەن تالاپ ارىزدى زەرتتەپ جاتقانىن مالىمدەدى.
كومپانيانىڭ حابارلاۋىنشا، حولدينگ رەسەي اۋماعىندا قىزمەت جۇرگىزبەيدى جانە ەلدە اكتيۆتەرى جوق. سونداي-اق كومپانيا بۇل ءىستىڭ حولدينگ قىزمەتىنە ەلەۋلى قاۋىپ توندىرەدى دەپ ەسەپتەمەيتىنىن جەتكىزدى.
تيمۋر تۇرلوۆ 2010 جىلدارى رەسەيدە بانك، بروكەرلىك جانە ينۆەستيتسيالىق باعىتتاردا بيزنەس جۇرگىزگەن. 2022 جىلى ول رەسەي ازاماتتىعىنان باس تارتىپ، قازاقستان ازاماتتىعىن الدى.
Freedom Holding رەسەيلىك اكتيۆتەرىنەن شىعۋ پروتسەسىن سول جىلدىڭ قازان ايىندا اياقتاعان.
بۇعان دەيىن رەسەيدە W-Empirical Holding Corp. كومپانياسىنا قاتىستى قىلمىستىق ءىس قوزعالعان. تەرگەۋ نۇسقاسى بويىنشا، رەسەيلىك ينۆەستورلار شەتەلدىك اكتسيالاردىڭ باعاسىن مانيپۋلياتسيالاپ، كومپانياعا 150 ميلليون رۋبلدەن استام شىعىن كەلتىرگەن.
2025 جىلدىڭ ساۋىرىندە رەسەيلىك سوت ينۆەستور سەرگەي كۋلەشوۆتى W-Empirical Holding Corp.-تان 162 ميلليون رۋبل جىمقىرۋ ءىسى بويىنشا ءۇش جىلعا شارتتى تۇردە باس بوستاندىعىنان ايىرعان.
ايتا كەتەيىك، تيمۋر تۇرلوۆ Forbes Kazakhstan رەيتينگى بويىنشا 2026 جىلى قازاقستاننىڭ ەڭ باي 75 بيزنەسمەنى اراسىندا التىنشى ورىنعا يە بولدى. ونىڭ بايلىعى 5,2 ميلليارد دوللارعا باعالانعان. 2025 جىلى كاسىپكەر بۇل رەيتينگتە 5,8 ميلليارد دوللار بايلىعىمەن ەكىنشى ورىندا بولعان.
