قىرعىزستانداعى بالالار «Balapan» تەلەارناسىن كورىپ، قازاقشا سويلەپ ۇيرەنگەن. ولاردىڭ قاتارىندا قىرعىز دەپۋتاتى نۇرجىگىت قادىربەكوۆتىڭ قىزدارى دا بار. بۇل تۋرالى دەپۋتات قىرعىز رەسپۋبليكاسىنىڭ جوگوركۋ كەنەش وتىرىسىندا بايانداعان.
ول تەك قازاق تىلىندە ساپالى كونتەنت ۇسىناتىن «Balapan» تەلەارناسى قىرعىز بۇلدىرشىندەرىنىڭ اينىماس سەرىگىنە اينالعانىن ايتادى. سونداي-اق، دەپۋتات جوعارى مىنبەردە «Balapan»-دى نەگىزگە الىپ، قىرعىز بالالار تەلەارناسىن دا تەك مەملەكەتتىك تىلدەرىندە، قىرعىزشا كورسەتەتىن كانال ەتىپ وزگەرتۋدى ۇسىنعان.
سەبەبى، «بالاستان» قازىر قىرعىز جانە ورىس تىلدەرىندە حابار تاراتادى.
«قازاقستان» تەلەارناسىنىڭ تىلشىسىنە بەرگەن ارنايى سۇقباتىندا دەپۋتات قىرعىز بۇلدىرشىندەرى ءسۇيىپ كورەتىن «Balapan» ارناسىنىڭ قىزمەتىن جوعارى باعالاپ، ونداعى جوبالار وتباسىلىق قۇندىلىقتاردى ناسيحاتتايتىنىن جانە بالا پايىمىنا لايىقتالىپ جاسالعانىن اتاپ ءوتتى.
«Balapan» – بۇل ەڭ مىقتى كانال. بالالاردىڭ پسيحولوگياسىن ەسكە الىپ دايارلانعان. كونتەنتى ابدەن باي. جاعىمدى. ءتالىم-تاربيە، بالالارعا تاريحتى ۇيرەتىپ وتىرعان باعدارلامالار بار»، - دەيدى نۇرجىگىت قادىربەكوۆ.
2010 جىلى اشىلعان «Balapan» ارناسىن بۇگىندە قازاقستان اۋماعىندا جالپى ەسەپپەن 2 ميلليوننان استام ابونەنت كورەدى.
وسى ۋاقىتقا دەيىن تەلەارنادا 302 تەلەجوبا، 21 تەلەحيكايا جانە جالپى ءبولىم سانى 3 مىڭعا جۋىق 103 انيماتسيالىق جوبا جاسالىپ، ەفيردەن وتكەن. ايرىقشا اتاپ وتەرلىگى، «Balapan» Kantar كومپانياسى جۇرگىزەتىن رەيتينگ جۇيەسى بويىنشا وتاندىق ۇزدىك 10 تەلەارنانىڭ ىشىندە سوڭعى ەكى جىل قاتارىنان 7-ورىندا تۇر.
بيىل دا ارنانىڭ بالالارعا ۇسىنار بازارلىعى مول. ارنا ۇجىمىنىڭ ايتۋىنشا، ەفيردەن شىعاتىن تانىمدىق، ويىن-ساۋىق باعدارلامالار سانى ارتادى. سونىمەن قاتار، كورەرمەن كوزايىمىنا اينالعان «توقتى مەن سەركە» انيماتسيالىق جوباسىنىڭ جاڭا سەريالارى جاسالىپ جاتىر ەكەن.
بيىل 100 جىلدىعى تويلانىپ جاتقان جەزتاڭداي ءانشى روزا باعلانوۆانىڭ جانە جارق ەتكەن مايتالمان سپورتشى بەكزات ساتتارحانوۆتىڭ بالالىق شاعىنا ارنالعان ادەمى مۋلتحيكايالار دا جاڭا ماۋسىمدا ەفيرگە شىعادى.
”ادىرنا” ۇلتتىق پورتالى
