بارلىق زارداپ شەككەندەرگە كومەك كورسەتىلەدى

2668
Adyrna.kz Telegram

2022 جىلعى 24 ساۋىردە تۇركىستان وبلىسى قازىعۇرت، سارىاعاش اۋداندارىندا جاۋىن-شاشىن مەن كەنتاۋ قالاسىندا قاتتى جەل بولىپ، تابيعي اپات ورىن الدى.

قۇتقارۋ جۇمىستارىنا وبلىستىق توتەنشە جاعدايلار دەپارتامەنتىنىڭ جانە جەرگىلىكتى اتقارۋشى ورگانداردىڭ 100-دەن اسا قىزمەتكەرى جۇمىلدىرىلدى. ولار 15 بىرلىك تەحنيكا، 13 موتوپومپا كۇشتەرىمەن سۋدى سورۋ جانە ارىقتاردى تازالاۋ جۇمىستارىن جۇرگىزدى.

تابيعي اپات سالدارىنان 50 ادام قاۋىپسىز ايماققا كوشىرىلدى. زارداپ شەككەندەر جوق. الدىن الا ەسەپپەن، 53 ءۇيدىڭ اۋلاسىنا، 19 ۇيگە، 1 مەيرامحانا مەن 16 عيماراتقا سۋ كىرگەنى انىقتالدى. سونىمەن قاتار، 370 باس مال شىعىنى ورىن الدى.


ورىن العان جاعدايعا بايلانىستى، قر پرەزيدەنتى ق.توقاەۆتىڭ تاپسىرماسىنا سايكەس، وبلىس اكىمىنىڭ توراعالىعىمەن ارنايى كوميسسيا قۇرىلدى. وبلىستىق بيۋدجەتتىڭ رەزەرۆتىك قورىنان قارجى قارالىپ، كەلەسىدەي كومەك كورسەتىلەتىن بولادى:
1. ءۇي جانۋارلارىنىڭ شىعىنىنا ەرەجەگە سايكەس وتەماقى تولەنەدى;
2. تۇرعىن ۇيلەر قايتا قالپىنا كەلتىرىلەدى;
3. عيماراتتار مەن تۇرعىن ۇيلەردىڭ شاتىرى قالپىنا كەلتىرىلەدى;
4. شارۋاشىلىق عيماراتتاردى قالپىنا كەلتىرۋگە كومەك كورسەتىلەدى.

قازىرگى تاڭدا، كوميسسيا تاراپىنان ورىن العان شىعىندار كولەمى ەسەپتەلۋدە. بارلىق زارداپ شەككەندەرگە تولىق كومەك كورسەتىلەدى.

"ادىرنا" ۇلتتىق پورتالى

پىكىرلەر