اباي وبلىسىنداعى جاعداي تۇراقتالعانىمەن، جەل تۇرىپ، بۇعان دەيىن سوندىرىلگەن وشاقتار قايتادان كۇشەيىپ، جانا باستاعان. بۇل تۋرالى جۋرناليست وڭعار الپىسبايۇلى “ادىرنا” ۇلتتىق پورتالىنا ايتىپ بەردى.
كەشەگىدەن جاعداي تۇراقتى. 8 وشاقتى ءورت ءسوندىرۋ جۇمىستارى جۇرگىزىلىپ جاتىر. تىك ۇشاقپەن جوعارىدان قاراعان كەزدە ورتەنىپ جاتقان جەرلەر قورقىنىشتى. بۇگىن ءبىز ءورت بولىپ جاتىرعان بىرنەشە جەرگە بارىپ كوردىك.
توتەنشە جاعدايلار قىزمەتكەرلەرىنە ەڭ قيىنى - قالىڭ ورتتەن قاتتى جالىن مەن ىستىق سوعىپ تۇرادى. ول جەردە جاي ءجۇرۋدىڭ، دەمالۋدىڭ ءوزى قيىن. قىزمەتكەرلەر سونداي جاعدايدا جۇمىس ىستەپ جاتىر. ەگەر قاتتى تۇنشىعىپ بارا جاتىرسا وزدەرىنىڭ تاسىلدەرى بار ەكەن. بەتتەرىنە سۋلى ورامال نەمەسە سۋلانعان كەز كەلگەن شۇبەرەك باسىپ، ەڭكەيىپ، جەرگە جاقىنداپ تىنىستاپ، اۋا جۇتىپ الادى. بىراق ۇزاق دەمالىپ وتىراتىن ۋاقىتتارى دا جوق. تاماقتارىن سول جاققا الىپ كەلىپ جاتىر، - دەپ قىزمەتكەرلەردىڭ جاعدايىن ايتتى.
ايتۋىنشا، تۇرعىنداردىڭ بارلىعى جۇمىلا كۇش سالۋدا. وقيعا بولعان جەرگە كومەك قولىن سوزامىن دەگەندەر اعىلىپ جاتىر ەكەن.
ەڭ قۋانتارلىعى - ءبىزدىڭ حالقىمىزدىڭ ۇيىمشىلدىعى. سەبەبى، مىندا تاماقتاندىرۋ پۋنكتەرى ورنالاسقان. ول جەرگە وسى ماڭايدا ورنالاسقان اۋىلداردىڭ ايەل ەرىكتىلەرى كەلىپ، كۇنىنە 10 شاقتى قازان تاماق پىسىرەدى. سول جاقتا جۇرگەن قىزمەتكەرلەرگە تاماقتاردى كولىكتەرمەن جىبەرىپ جاتىر. ودان بولەك، بىرنەشە كولىككە تيەلگەن ازىق-تۇلىك، سۋ، وزگە دە قاجەتتى زاتتاردىڭ بارلىعى لەك-لەگىمەن كەلىپ جاتىر.
ءدال قازىرگى ۋاقىتتا 1500-گە جۋىق ادام، 300-گە جۋىق تەحنيكا، 11 تىكۇشاق ءورت ءسوندىرۋ جۇمىستارىمەن اينالىسۋدا. بۇگىن تاڭەرتەڭ دە جەتىسۋ، الماتى وبلىستارىنان قوسىمشا كۇش كەلگەن. اقپارات بويىنشا، 1000 ادام دەگەن، - دەدى جۋرناليست.
وڭعار الپىسبايۇلى وقيعا ورنىندا قازا تاپقانداردىڭ وتباسىمەن دە سويلەسكەنىن ايتتى.
ەڭ قورقىنىشتىسى - بۇل جەردەن 14 ادامنىڭ ءمايتى تابىلدى. ورمان شارۋاشىلىعىنىڭ قىزمەتكەرلەرىنىڭ بارلىعى ورتەنىپ كەتكەن. جاڭا سول كىسىلەردىڭ تۋىستارىمەن سويلەستىك.
ورماننىڭ ىشىنەن 2 ادام شىققان ەكەن. ەكى ادام دەپ ەستىدىك، بىراق ەكىنشىسىن ناقتىلاي المادىق. ال بىرەۋىنىڭ اكەسىمەن سويلەستىك. ونىڭ ءوزى ءالى دە سول ءورت ءسوندىرۋ جۇمىستارىنا قاتىسىپ ءجۇر ەكەن. ونىڭ ايتۋى بويىنشا، ول جىگىتكە ورتكە جاقىنداۋعا رۇقسات بەرمەگەن. كوزىنە جاس الىپ تۇرىپ، ايتىپ بەردى.
“قاشىپ شىققان ادامنىڭ اكەسى ءبىزدىڭ تانىستارىمىز ەدى، جاقسى ارالاسقان ادامدارىمىز ەدى. تۇنگى ساعات 10-كەزىندە شامامەن بايلانىسقا شىقتى راتسيامەن: ء“بىزدى تاستاماڭىزدار! ءبىز ءالى دە وسىندامىز. ءبىزدى ءورت قورشاپ الدى”، دەپ بايلانىسقا شىعىپ، سوڭعى سوزدەرى سول بولدى”، -دەيدى.
ودان كەيىن ولارعا بارىپ جەتۋ، قۇتقارىپ الۋ مۇمكىن بولماعان. وكىنىشكە قاراي، ولاردىڭ مايىتتەرى، تەحنيكاسى دە كەشە تابىلدى. تۋىستارى قان جۇتىپ، قايعىرىپ وتىر. جاعداي شامامەن وسىنداي، - دەدى جۋرناليست.
سونداي-اق، وبلىستىق وڭىردە جەل كۇشەيىپ كەتكەن. بۇعان دەيىن سوندىرىلگەن وشاقتار قايتادان كوتەرىلىپ، قايتادان جانا باستادى.
جەل كۇشەيگەن جەرلەردىڭ بىرنەشەۋىن بارىپ كوردىك. مىناۋ جەل ساعات سايىن باعىتىن اۋىستىرىپ، ءورت ءتۇرلى باعىتتا تارالىپ جاتىر. ونىڭ بارلىعىن تىك ۇشاقپەن جوعارىدان بارلاپ، قاي باعىتتا ءدال قازىر جانىپ جاتىرعانىن، قاي جەردە قاتتى جانىپ جاتىرعانىن جانە قاي جەرگە قانشا كۇش جىبەرۋ كەرەك ەكەنىن انىقتاپ وتىر. ازىرگە وسى”،-دەپ وقيعا بولعان جەردەن وڭعار الپىسبايۇلى حابار بەردى.
