جامبىل وبلىسىندا اسكەردە قازا بولعان ساربازدىڭ دەنەسىنەن جاراقاتتار انىقتالعان جوق. بۇل تۋرالى ءباسپاسوز ءماسليحاتى بارىسىندا قر قارۋلى كۇشتەرى باس شتابى باستىعىنىڭ ورىنباسارى سەرىك بورامباەۆ ءمالىم ەتتى، دەپ حابارلايدى "ادىرنا" ۇلتتىق پورتالى inform.kz-كە سىلتەمە جاساپ.
«وكىنىشكە قاراي، 22 ساۋىرىندە گۆاردەيسك اسكەري قالاشىعىندا ورنالاسقان گوسپيتالدە اسكەر قاتارىنا جاڭادان شاقىرىلعان قاتارداعى جاۋىنگەر الىبەك قالباي قايتىس بولدى. ول جەكە قۇرامنىڭ ساپقا تۇرۋى كەزىندە ءوزىن ناشار سەزىنىپ، ەسىنەن تانىپ قالعان. مەديتسينا قىزمەتكەرلەرى جاس ساربازدى قۇتقارىپ قالا المادى. مارقۇمنىڭ اتا-اناسىنا، تۋعان-تۋىسقاندارى مەن جاقىندارىنا قايعىرىپ كوڭىل ايتامىز»، - دەدى سەرىك بورامباەۆ.
ونىڭ ايتۋىنشا، قاتارداعى جاۋىنگەردىڭ قازا بولۋ سەبەبىن انىقتاۋ ماقساتىندا ارنايى جەدەل-تەرگەۋ توبى قۇرىلعان. قاجەتتى ساراپتامالار جۇرگىزىلۋدە.
«سوت-مەديتسينالىق ساراپتاما ناتيجەسىندە، قازا بولعانعا دەيىن ساربازدان جاراقاتتار مەن كوگەرۋلەر انىقتالماعان. قازىرگى ۋاقىتتا تەرى قاباتتارىنىڭ وزگەرۋى ساراپتاما جۇرگىزۋمەن جانە قازا بولۋدىڭ بيولوگيالىق پروتسەسىمەن بايلانىستى. تەرگەۋدىڭ وبەكتيۆتى جۇرگىزىلۋىنە ءبىز دە مۇددەلىمىز. سەبەبى بارلىق ساتىداعى كومانديرلەر باعىنىستى اسكەري قىزمەتشىلەردىڭ ءومىرى مەن دەنساۋلىعىنا اتا-انالار مەن مەملەكەت الدىندا جاۋاپتى»، - دەدى قر قارۋلى كۇشتەرى باس شتابى باستىعىنىڭ ورىنباسارى.
ءوز سوزىندە ول قورعانىس مينيسترلىگىنىڭ باسشىلىعى ەشتەڭەنى جاسىرىپ قالمايتىنىن، ساربازدىڭ اتان-اناسى مەن جاقىندارى وقيعادان كەيىن دەرەۋ اسكەري بولىمگە بارىپ، ۇلدارى قىزمەت اتقارعان بولىمشەدەگى تۇرمىستىق جاعدايمەن تانىسقانىن جەتكىزدى.
ەستەرىڭىزگە سالا كەتسەك، وسىعان دەيىن قر پرەزيدەنتى اسكەردە قازا تاپقان الىبەك قالبايدىڭ ءولىمىنىڭ سەبەبىن انىقتاۋدى تاپسىرعانىن حابارلاعان ەدىك.
"ادىرنا" ۇلتتىق پورتالى
