قىتاي شىرىمەيتىن جاساندى الماسىنا جازۋ جازىپ جىبەرسە دە تۇتىنامىز

2897
Adyrna.kz Telegram

سۋرەتكە قاراڭىز!.. بۇل – استاناداعى ساۋدا جەلىلەرىنىڭ سورەسىندە تۇرعان قىتاي الماسى.

ءوزىمىز "سالتانات" دەپ قازاقشا اتاۋمەن اسپەتتەپ جۇرگەن بۇل شىركىندەرىڭ شىرىمەيدى. قازاقستان نارىعىنداعى مۇلدە قۇرت تۇسپەيتىن جالعىز جەمىس. جەرگە ءتۇسىپ نەمەسە بالەن شاقىرىم قاشىقتىقتان جەتكىزەتىن جۇك كولىگى ىشىندە ۇرىلعان جەرى ءبىزدىڭ تابيعي المالارعا ۇقساپ قارايىپ تا كەتپەيدى. قۇرامىندا تەمىرى باسىم ءوزىمىزدىڭ ونىمدەر سياقتى ءتىس تيگەن ورنى سارعايۋى كەرەك ەدى عوي. ويتپەك تۇگىل، مۇندا ءتىستىڭ ءىزى دە قالمايدى. كىرش ەتكىزسەڭ، مورت سىنادى. ءيىسى دە، ءدامى دە جوق. نەگە دەسەڭىز...

ءبىر كەزدەرى مامانداردىڭ تىنىمسىز تاسىمالداناتىن مۇنداي المالارعا شامادان تىس حيميكاتتار قوسىلاتىنىن، قىتايلاردىڭ پارافينمەن پىسىرەتىندىگىن ايتىپ، دابىل قاققانى ءمالىم. اقپارات كوزدەرىنەن قىتايداعى الما وسىرەتىن قويمادا جۇرگەن جۇكشىلەردىڭ دەنەلەرىن تۇمشالاپ، "سكافاندر" كيىپ الاتىندىعىن دا وقىعانبىز. سوسىن جەڭسىك جەمىستەردىڭ ارقايسىسىنا كيگىزىلگەن توركوزدى اق داكەلەردى ەگەۋقۇيرىق ءىنىنىڭ اۋزىنا تاستاسا، سونى جەگەن ول بايعۇستار بىردەن ءولىپ كەتەدى ەكەن. وسىنداي تولىپ جاتقان اشكەرە ايعاقتاردان حاباردار بولا تۇرا، سول ساتتە "ازبايتىن-توزبايتىن" ونىمنەن ءۇزىلدى-كەسىلدى باس تارتۋدىڭ ورنىنا، "قارا پياردىڭ ءوزى – پيار" دەگەننىڭ كەرىمەن جاپپاي "سالتانات" جەگىش بولىپ الدىق. "يتجاندى" دەلىنەتىن ادامنىڭ اعزاسى نەتكەن مىقتى ەدى؟! ءيتىڭنىڭ ءوزى بۇنداي بولماس...

قازىر بىزدە قىتايدان ەكسپورتتاپ جەتكىزىلەتىن جەمىستەردىڭ ىشىندە الما مەن ءجۇزىم باسىم. باعاسى دا وتاندىق ونىمدەردەن ەپتەپ ارزان. اسىرەسە، قازاقستاندىق نارىقتى 2007-2008 جىلدارى ەرەكشە قارقىنمەن جاۋلاپ ۇلگەردى دە، سول ساتتە 60 مىڭ توننادان ارتىق الما مەن المۇرتقا (المانىڭ ەكسپورتى بىردەن 90 پايىزعا وسكەن) قارىق بولدىق. ەندى مىنە، ارقايسىسىندا ءبىر-بىرىنە ۇقسامايتىن قىتايلىق "قولتاڭبا" ءجۇر. ساۋدا سورەسىن سۋرەتكە تۇسىرۋگە جازباشا رۇقسات سۇراپ، ونىڭ جاۋابىن تاۋلىكتەپ توسىپ وتىرماعاندىقتان، دايەك ءۇشىن المانىڭ ەكى داناسىن ساتىپ الا سالۋعا تۋرا كەلدى. وسىعان قاراپ-اق، قىسىق كوز كورشىلەردىڭ "قولدان جاسايتىندارىنا" سەنبەسكە شاراڭ قالمايدى ەكەن. ال بۇلارداعى يەروگليفتىڭ اۋدارماسىن جاساۋدى سول ءتىلدى وقىعانداردىڭ ەنشىسىنە قالدىردىق.

جالپى، قىتايلىق تاۋارلاردىڭ قۇرامىنان ۋلى قوسىندىلار ءجيى تابىلادى. باسقاسىن بىلاي قويعاندا، ىستىق سۋعا جەدەل پىسەتىن كەسپەلەرىندە ەرلەردىڭ ۇرىعىن ءولتىرىپ، بەلدەن ايىراتىن قوسپا جۇرگەندىگى امبەگە ايان. ونداي ولقى تاۋارلاردى تۇتىنۋعا اقش، جاپونيا، مالايزيا سىندى مەملەكەتتەر باياعىدا-اق تىيىم سالىپ تاستاعان. ءبىز ءۇشىن دە قىتاي برەندىن شەكارادا ابدەن تەكسەرىپ وتكىزەتىۇعىن ارنايى زەرتحانالاردىڭ بولۋى اسا ماڭىزدى.

___________________________________________________________________________________________________________ qamshy.kz

پىكىرلەر