وزبەكستان مەن تۇركىمەنستان اراسىندا ەركىن ساۋدا رەجيمى كۇشىنە ەندى. بۇل تۋرالى وزبەكستاننىڭ ينۆەستيتسيالار، يندۋستريا جانە ساۋدا مينيسترلىگىنىڭ (ميت) ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى Fergana اگەنتتىگىنە سىلتەپ.
جاڭا رەجيم اياسىندا 25 اقپاننان باستاپ ەكى ەلدىڭ اۋماعىندا وندىرىلگەن تاۋارلار ءۇشىن كەدەندىك باج سالىعى الىنىپ تاستالدى، ءوزارا ساۋدادا شەكتەۋلەر جويىلدى جانە ساۋدا راسىمدەرى جەڭىلدەتىلدى. ماسەلەن، تۇركىمەنستاننان اكەلىنەتىن تسەمەنتكە (كەدەندىك باج 100% بولدى), تەكستيلگە (50%), جيھازعا (50%), شىنى ىدىسقا (50%), سۋ جىلىتقىشتارعا (15%), پلاستماسسا جانە پوليپروپيلەن بۇيىمدارىنا (10%), شۇجىقتار مەن ەت ونىمدەرىنە (كەدەندىك باج 2 دوللار/كگ), ماقتا مايىنا (1 دوللار/كگ) كەدەندىك باج سالىعى الىنىپ تاستالدى.
مينيسترلىك اتاپ وتكەنىندەي، باجسىز ساۋدا رەجيمىن ەنگىزۋ تاۋار اينالىمىنىڭ ارتۋىنا جانە ەكى ەل اراسىنداعى ينۆەستيتسيالىق ىنتىماقتاستىقتىڭ دامۋىنا ىقپال ەتەدى.
2024 جىلدىڭ قورىتىندىسى بويىنشا وزبەكستان مەن تۇركىمەنستان اراسىنداعى تاۋار اينالىمى 1,14 ميلليارد دوللاردى قۇراپ، وتكەن جىلمەن سالىستىرعاندا 5,5% ءوستى.
بۇعان دەيىن ەكى ەل اراسىندا وزبەكستاننىڭ حورەزم وبلىسىنداعى شاۆات اۋدانىندا ەركىن ساۋدا ايماعىن قۇرۋ تۋرالى حابارلانعان بولاتىن. ۇكىمەتتەر اراسىنداعى كەلىسىم 2021 جىلعى 5 قازاندا قول قويىلعان. 2022 جىلدىڭ شىلدە ايىندا وزبەكستان مەن تۇرىكمەنستان پرەزيدەنتتەرى بۇل جوسپاردى راستادى جانە تاشكەنت پەن اشحابادتا ەكى رەسپۋبليكا اراسىندا ساۋدا ۇيلەرىن اشۋدى شەشتى. سول جىلدىڭ قازان ايىندا شاۆكات ميرزيوەۆ پەن سەردار بەردىمۋحامەدوۆ «حورەزم – داشوگۋز» شەكارالاس ساۋدا ايماعىنىڭ قۇرىلىسىن باستاۋ راسىمىنە قاتىستى.
ايماق 30 جىل مەرزىمگە قۇرىلدى، مەرزىمى ۇزارتىلۋى مۇمكىن. وندا تەك وسى ەكى ەلدە وندىرىلگەن ونىمدەردى «ەركىن كەدەن ايماعى» رەجيمىندە ساتۋ رۇقسات ەتىلەدى. ايماققا كىرۋ تەك ارنايى وتكىزۋ پۋنكتتەرى ارقىلى جۇزەگە اسىرىلادى، ال تۇركىمەنستان ازاماتتارى مەن وزبەكستانعا كەلەتىن شەتەلدىكتەر ايماقتا 15 كۇنگە دەيىن ۆيزا الماي جۇرە الادى.
