بۇگىن شىمكەنتتە №3 اۆتوماتتاندىرىلعان گاز تاراتۋ ستانتسياسى ىسكە قوسىلدى. بۇل – قازاقستانداعى ەڭ ۇلكەن گاز تاراتۋ ستانتسياسى. ونىڭ قۋاتتىلىعى ساعاتىنا 250 مىڭ تەكشە مەتردى قۇرايدى.
اگرس-ءتى ىسكە قوسۋعا ارنالعان سالتاناتتى راسىمگە شىمكەنت قالاسىنىڭ اكىمى مۇرات ايتەنوۆ پەن «QazaqGaz» ۇلتتىق كومپانياسى» اكتسيونەرلىك قوعامىنىڭ باسقارما توراعاسى سانجار جاركەشوۆ قاتىستى.
– شىمكەنت قالاسى قازىردىڭ وزىندە ساعاتىنا 250 مىڭ تەكشە مەتر تابيعي گاز پايدالانادى. بۇعان دەيىن جۇمىس ىستەپ تۇرعان ەكى اگرس-ءتىڭ جيىنتىق قۋاتى ساعاتىنا 180 مىڭ تەكشە مەتردى قۇرايدى. وسىعان بايلانىستى قالادا گازدىڭ قىسىمى تومەندەپ، تاپشىلىق بايقالعان بولاتىن. ال، №3 اۆتوماتتاندىرىلعان گاز تاراتۋ ستانتسياسىنىڭ ىسكە قوسىلۋىنىڭ ارقاسىندا وسى پروبلەما تولىعىمەن شەشىلدى. ەندى قالاداعى جاڭادان ىشكى جۇيەلەرى جۇرگىزىلگەن بارلىق شاعىن اۋداندارعا گاز بەرۋگە مۇمكىندىك تۋىنداپ وتىر. بۇل – تۇرعىنداردىڭ تۇرمىسىن جاقسارتۋ جولىنداعى ماڭىزدى قادام، – دەدى م.ايتەنوۆ.
ايتا كەتەيىك، نىساننىڭ قۇرىلىسى 2019 جىلى باستالىپ، 2021 جىلدىڭ سوڭىندا اياقتالدى.
– مەملەكەت باسشىسى قاسىم-جومارت توقاەۆ حالىقتىڭ بارىنشا كوپ بولىگىن تابيعي گازبەن قامتۋدى ءبىزدىڭ الدىمىزعا باستى مىندەت ەتىپ قويىپ وتىر. وسىعان بايلانىستى گاز تاسىمالداۋ ينفراقۇرىلىمىن دامىتۋ باعىتىندا اۋقىمدى جۇمىس اتقارىپ جاتىرمىز. بۇگىن شىمكەنتتە ىسكە قوسىلىپ وتىرعان جاڭا ستانتسيا سونىڭ جارقىن كورىنىسى، – دەدى س.جاركەشوۆ.
ماماندار ايتۋىنشا، №3 اگرس-ءتىڭ قوسىلۋىنىڭ ناتيجەسىندە شىمكەنت قالاسىندا الداعى بىرنەشە جىل بويىنا گاز تاپشىلىعى تۋىندامايدى.
