"امانات" پارتياسىنىڭ 15 ساۋىردەگى وتىرىسىندا ءماجىلىس دەپۋتاتى گەننادي شيپپوۆسكيح رۋسلان شپەكباەۆقا قارۋ-جاراق سالاسىنا قاتىستى سۇراق قويدى، دەپ جازادى "ادىرنا" ۇلتتىق پورتالى.
"قاڭتار وقيعاسىندا ءبىز ۇقشۇ اسكەرىنەن كومەك سۇراۋعا ءماجبۇر بولدىق. وزدەرىڭىز ايتقانداي، بۇل وقيعا دەيىن دە كەيىن دە پرەزيدەنت بىرقاتار تاپسىرمالار بەردى. قاڭتار وقيعاسىنا دەيىن قورعانىس مينيسترلىگى اي قاراپ ءجۇردى مە، سوندا؟ قورعانىستى دامىتۋعا قىرۋار قانشا قاراجات كەتىپ جاتىر. بۇل - ءبىر. ەكىنشىسى، بۇشگىنگى ءبىزدىڭ دوڭگەلەك ۇستەل ناقتى وتاندىق ونەركاسىپكە بايلانىستى. ناقتى سۇراق قويعىم كەلەدى، ءبىز وتاندىق قارۋلاردان نە شىعارامىز؟ قۇراستىرۋ ماسەلەسىنەن بولەك، ءبىز نە وندىرەمىز؟ رەسەيدە وزىندىك "ارماتا" تانكىسى بار، امەريكادا "ابرامس" تانكىسى شىعادى. ءتىپتى كىشكەنتاي ءيزرايلدىڭ ءوزى "ۋزي" قارۋىن شىعارادى. ال بىزدە قارۋ-جاراققا قىرعىن اقشا كەتىپ جاتىر. ال ءبىز نە وندىرەمىز، نە شىعارامىز؟" دەدى گەننادي گەناديەۆيچ.
شپەكباەۆ مىرزا ورىس ۇلتىنىڭ قازاق تىلىندە قويعان سۇراعىنا رۇقسات سۇراپ ورىس تىلىندە جاۋاپ بەردى:
"جالپىلاي العاندا قورعانىس قارۋ جاراقتارى تۋرالى ايتار بولساق، ءبىزدىڭ رەسپۋبليكادا سوۆەتتىك سيستەما ءالى دە قالدى. ياعني، ارنايى قارۋ جاراقتار شىعاراتىن بولىمدەر بار. ءبىزدىڭ ەلدە ۇشاق، راكەتا، تانك سىندى قۇرالدار ساقتالعان جوق. كەڭەستىك وداقتان قالعاندارى عانا. ولاردى شىعارۋدىڭ وزىنە كەلەر بولساق، بىزدەن شىققان كۇندە دە باسەكەگە قابىلەتتى تۇردە وندىرىلەدى دەپ ايتا المايمىن" دەپ جاۋاپ بەردى گەنەرال شپەكباەۆ.
